Андижон вилоятидаги мактаблардан бирида ўқувчи ўз ўқитувчисига мушт туширди. Бу ҳақда “Бу кун” дастурида хабар берилди.
Маълум қилинишича, бундан бир ой аввал Андижон туманидаги умумтаълим мактабида 10-синфдаги дарс вақтида ўқувчи ва ўқитувчи иштирокида жанжал содир бўлган. Тортишув иштирокчилари жаримага тортилган.
“Сақични бер деганда, оғзимда сақич йўқ, хоҳласанг келиб ол деган. Келиб олганда худди ураётгандек бўлган. Кейин ўқувчи муштлаб урган. Воқеадан кейин яраштирув бўлган. Бу иш судгаям чиқарилган”, дейди мактаб масъули.
Воқеа иштирокчиси бўлган бола эса ўқитувчи уни ҳақоратлаганини таъкидламоқда.
“Менга сақичинг борми, деди. Йўқ, десам топиб олсам у қиламан, бу қиламан деб ҳақорат қилишни бошлади. Бўпти топиб олаверинг, десам келиб менга ташланяпти. Мен ўзимни ҳимоя қилдим. Менга икки марта шапалоқ урди. Ўрнимдан турсам, яна 2 марта шапалоқ уряпти. Ошналаримнинг олдида, ҳамманинг олдида уриб ташлаяпти”, дейди ўқувчи бола.
Ўқитувчига нисбатан ҳайфсан берилган.
Мактабдаги жанжаллар
Аввалроқ Сирдарёда ўқитувчи 1-синф ўқувчисини қўлига игна санчиш билан жазолангани ҳақида хабарлар тарқалганди. Суриштирув давомида юқоридаги ҳолат тасдиғини топмаган.
Қашқадарёнинг Шаҳрисабз туманидаги мактабда ўқитувчи 5-синф ўқувчисини уриб жароҳатлади. Қарши шаҳридаги мактабда ўқитувчи ва ўқувчи ёқалашгани тасвирлари тарқалди. Алгебра фани ўқитувчиси ва 10-синф ўқувчиси бўлган икки қиз ўртасида ўзаро келишмовчилик келиб чиқиб, оғзаки тортишиб қолган. Уларнинг хатти-ҳаракатларига чора кўриш учун судга берилган.
Тошкентдаги мактабда аёл дастлабки иш кунида ўқувчини калтаклагани ҳам кенг муҳокамаларга сабаб бўлганди. Аёл жазоланиб, мактаб директори ишдан олинганди.
Танганинг иккинчи томони: ўқитувчига тазйиқ ўтказиш ҳолатлари
2024 йилнинг октябрида Сирдарё туманидаги 2-мактабда икки ўқувчи қиз ўқитувчини урганди. Ўша йилнинг апрелида Фарғонада мактаб ўқитувчиси ўқувчининг қариндошлари томонидан калтакланганди. 2023 йилнинг майида Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди. Сентябрь ойида Сурхондарёда мактаб директори ўқитувчининг яқин қариндошлари томонидан калтакланганди. Мазкур ҳолатлар юзасидан ҳуқуқбузарларга қилмишидан келиб чиққан ҳолда жазо чоралари кўрилган.
- Тошкентдаги мактабда болани урган ўқитувчи ишдан бўшатилиб, яна ишга тикланди.
- Қашқадарёдаги мактабда бир-бирига бўёқ сепган ўқувчиларнинг ота-онаси жазоланди.
- Тошкентдаги мактабда ўқитувчи болаларга “Катюша”ни ёдлатгани учун ишдан олиндими?
- Навоийда мактаб директори ўқувчиларни калтаклади.
- Тошкент вилоятидаги мактабда дарсга кеч қолганлар ўт юлишга мажбурланди.
Изоҳ (0)