Ўзбекистондаги айрим ўқитувчилар бир қатор устамалар жорий этилгани сабаб 20 миллион сўм атрофида маош олиш имконига эга бўлди.
Хусусан, Сурхондарёда айни пайтда 2 минг доллардан ортиқ оладиган 11 нафар ўқитувчи бор. Бу ҳақда вилоят таълим бошқармаси бошлиғи Ҳусниддин Мамадиев 15 май куни бўлиб ўтган видеоселектор йиғилишида президентга маълум қилди.
“Ҳурматли президент, шуни алоҳида таъкидлашимиз керак, бизнинг Сурхондарёда 2 минг доллардан ортиқ оладиган 11 та ўқитувчимиз бор. Буни ОАВда ҳам кўрсатдик. Ундан ташқари, 600 га яқин минг доллардан ортиқ оладиган ўқитувчиларимиз мавжуд”, дея унинг сўзлари келтирилган “Ўзбекистон24” телеканали эфирида.
Телеканал 18 май куни Наманганда ҳам 20 миллион сўм атрофида ойлик олаётган ўқитувчилар ҳақида репортаж эълон қилди. Жумладан, Наманган вилоятининг Наманган туманидаги мактабда ишловчи француз тили ўқитувчиси Замира Ҳамидова 22 миллион сўмдан ортиқ ойлик маош олади. Унинг таъкидлашича, авваллари ўқитувчилар мажбурий меҳнатга жалб этилгани, ойлик кам бўлгани учун бошқа касбга ўтиб кетиш фикрида бўлган.
Вилоятнинг Косонсой туманидаги иглиз тили ўқитувчиси Нигора Эгамова эса 20 миллион сўмдан ортиқ маош олади.
“Бир неча йил аввал, 5 миллион атрофида ойлик оладиган пайтимда куни келиб 20 миллион ойлик оламан деб ўйламагандим. Бу кун орзу эди, энди ҳақиқатга айланди” дейди у.
Репортажда айтилишича, минг доллар ойлик маош олувчи ўқитувчилар сони 60 минг нафардан ошди. Наманган вилоятининг Учқўрғон туманидаги давлат ихтисослаштирилган мактаб-интернатида тарих фанидан дарс берувчи Нозимжон Тожибоев кўзи ожизлигига қарамай, 1000 доллар маошга эришганини “Дарё”га сўзлаб берганди.
Давлат раҳбари раислигидаги видеоселектор йиғилишида малака, тил билиш, янги баҳолаш тизими, фан олимпиадалари каби мезонлар асосида ўқитувчиларга 10 дан ортиқ устама жорий қилингани, бундан самарали фойдаланган 60 минг ўқитувчи ҳозирда 8-12 миллион сўм маош олаётгани қайд этиб ўтилди.
Шавкат Мирзиёев 2025 йилга бориб олий тоифали ўқитувчиларнинг маошини эквивалент ҳисобида минг долларга етказилишини 2021 йилда, Сенат биносида қасамёддан сўнг таъкидлаб ўтганди.
“Қанчалик қийин бўлмасин, ўқитувчилар меҳнатини муносиб рағбатлантириш учун бор куч ва имкониятларимизни сафарбар этамиз. 2025 йилга бориб, олий тоифали ўқитувчиларнинг ойлик маошини эквивалент ҳисобида 1000 долларга етказиш чоралари кўрилади”, деган эди президент.
Миллий статистика қўмитаси ҳисоботига кўра, 2025 йилнинг биринчи чорагида таълим соҳасидаги ўртача ойлик иш ҳақи 4 млн 44 минг сўмни ташкил этган.
Изоҳ (0)