Ўзбекистонда Ихтисослаштирилган таълим муассасалари агентлиги тизимида Ал-Беруний номидаги халқаро мактаб-интернатни ташкил этилади.
“Президент иқтидорли фарзандлари” ташаббусини амалга ошириш чора-тадбирлари тўғрисидаги президент фармонига кўра, мактабда дарслар 2025/2026-ўқув йилидан бошланади.
Ушбу мактаб битирувчиларига давлат намунасидаги таълим тўғрисидаги ҳужжат (шаҳодатнома) билан бир қаторда етакчи хорижий олий таълим ташкилотларига ўқишга кириш имконини берувчи халқаро таълим дастури дипломи (International Baccalaureate) берилади.
Ўқувчилар билан индивидуал ишлаш тизими жорий этилиб, 1 нафар маслаҳатчи ва педагогга тўғри келадиган ўқувчилар сони нисбатининг чекланган нормативига мутаносиб равишда 1:15 ва 1:8 нисбатлар қўлланади.
Мактабда таълим жараёни вариатив ўқув режалар асосида амалга оширилади ҳамда ўқувчилар инглиз тилидан ташқари камида яна битта қўшимча хорижий тилга ўқитилади. Мактабда давлат бюджети маблағлари ҳисобидан ўқитиладиган ўқувчиларнинг умумий чекланган сони 180 нафарни ташкил этади.
Ўқувчиларга илмий-тадқиқот ва инновасион стартап лойиҳалар ҳамда бошқа ижтимоий лойиҳалар бўйича ўзининг портфолиосини шакллантиришга кўмак берилади.
Фармонга кўра, “Президент иқтидорли фарзандлари” ташаббуси ва уни қўллаб-қувватлаш бўйича миллий дастур амалга оширилади. Шунингдек, Иқтидорли ёшларни қўллаб-қувватлаш ҳамжамияти фаолияти йўлга қўйилади.
Миллий дастурни амалга ошириш доирасида қуйидаги рағбатлантиришлар қўлланади:
- Ал-Беруний номидаги халқаро мактаб-интернат нинг 10-синф ўқувчилари ва Миллий дастур иштирокчиси бўлган ва энг яхши кўрсаткичга эга 40 нафар ўқувчига дунёнинг нуфузли олий таълим ташкилотлари томонидан ташкил этиладиган қисқа муддатли ўқув дастурларида ҳар йили 1 маротаба қатнашиш;
- мактаб битирувчилари ва Миллий дастур иштирокчиси бўлган ўқувчиларнинг халқаро миқёсда эътироф этилган академик рейтингнинг энг илғор 100 та олий таълим ташкилотлари рўйхатидан жой олган хорижий олий таълим ташкилотларида таълим олиш харажатларини белгиланган тартибда қоплаш;
- мактаб маслаҳатчиларини уларга бириктирилган ўқувчиларнинг олий таълим ташкилотларига ўқишга қабул қилинишига қараб, мазкур фармонга мувофиқ бир марталик пул мукофоти билан тақдирлаш.
Ал-Беруний номидаги халқаро мактаб-интернат битирувчилари ва Миллий дастур иштирокчиларининг хорижда таълим олиши учун 2027 йилдан бошлаб 200 тадан квоталар ажратилади. Квота талабларига жавоб берадиган Мактаб битирувчилари ва Миллий дастур иштирокчиси бўлган ўқувчилар сони 200 нафардан кам бўлган тақдирда, ўқишга юбориш бўйича танлов ўтказилмайди.
Шавкат Мирзиёев 15 май куни ўтказган видеоселектор йиғилишида “Президент иқтидорли фарзандлари” миллий дастурини бошлаш ва “Гарвардчилар мактаби”ни очиш бўйича катта фармон имзолаганини айтганди. Президент бу йил 8-синф битирувчиларидан 60 нафари саралаб олиниб, халқаро мактабда “Топ-10” олийгоҳларига мақсадли тайёрланишини қайд этганди.
Изоҳ (0)