Ijtimoiy tarmoqlarda “Bolaga qo‘l ko‘targan zo‘ravon o‘qituvchi umuman maktabda ishlamasligi kerak, ishga tiklanmasligi kerak” degan mazmunda xabar tarqaldi. Holat yuzasidan Toshkent shahar maktabgacha va maktab ta’limi boshqarmasi ma’lumot berdi.
Unga ko‘ra, xabardagi voqea 2025-yil 15-yanvar kuni Yakkasaroy tumanidagi 319-maktabda sodir bo‘lgan. Boshlang‘ich sinf o‘qituvchisi 1-sinf o‘quvchisini sinf xonasida kaltaklagan. Ushbu holat bo‘yicha bolaning onasi o‘qituvchini sudga bergan. O‘qituvchi 2025-yil 16-yanvar kuni o‘z arizasiga muvofiq ishdan bo‘shagan.
Toshkent shahar Jinoyat ishlari bo‘yicha Yakkasaroy tuman sudining qaroriga muvofiq, Maʼmuriy javobgarlik to‘g‘risidagi kodeksning 52-moddasi 2-qismiga binoan bazaviy hisoblash miqdorining 4 baravari miqdorida, ya’ni 1 500 000 so‘m ma’muriy jarima jazosi tayinlangan. Keyin u ishga tiklash bo‘yicha fuqarolik ishlari bo‘yicha Yakkasaroy tumanlararo sudiga murojaat qilgan hamda qayta ishga tiklangan.
Ayni paytda ayrim ota-onalar sud qaroridan norozi. Hozirda mazkur holat Toshkent shahar maktabgacha va maktab ta’limi boshqarmasi nazoratiga olingan. Ota-onalar e’tiroziga ko‘ra, yuqoridagi holat boshqarma ishchi guruhi tomonidan o‘rganilmoqda.
Maktabdagi janjallar
Avvalroq Sirdaryoda o‘qituvchi 1-sinf o‘quvchisini qo‘liga igna sanchish bilan jazolangani haqida xabarlar tarqalgandi. Surishtiruv davomida yuqoridagi holat tasdig‘ini topmagan.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
Tanganing ikkinchi tomoni: o‘qituvchiga tazyiq o‘tkazish holatlari
2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi. Sentyabr oyida Surxondaryoda maktab direktori o‘qituvchining yaqin qarindoshlari tomonidan kaltaklangandi. Mazkur holatlar yuzasidan huquqbuzarlarga qilmishidan kelib chiqqan holda jazo choralari ko‘rilgan.
Izoh (0)