Мактабгача ва мактаб таълими вазирлиги “Сўнгги қўнғироқ” тадбирлари ўтказилиши тақиқлангани ҳақидаги хабарларни рад этди.
Маълум қилинишича, ижтимоий тармоқларда ушбу тадбир ўтказилиши тақиқлангани, чекловлар ўрнатилгани ҳақида турли нотўғри хабарлар тарқалмоқда. Жорий ўқув йилининг охирги куни 25 май, якшанба – дам олиш кунига тўғри келганлиги сабабли “Сўнгги қўнғироқ” тадбирлари 24 май – шанба куни ўтказилиши белгиланган.
“Вазирлик шуни маълум қиладики, мактабларимизда сўнгги қўнғироқ тадбирларини кўтаринки кайфиятда, тантаналар билан ўтказиш анъанаси бу йил ҳам давом этади”, дейилади хабарда.
Мактабгача ва мактаб таълими вазирлиги мактаблар жамоаларини, битирувчиларни, ота-оналарни тадбирлар жараёнида хавфсизлик қоидаларига риоя этишга чақирди.
Бундан аввал Ўзбекистон мактабларида 25 май куни бўлиб ўтадиган “Сўнгги қўнғироқ” тадбирларида валс тушишни тақиқланиши ҳақида хабар тарқалганди. Вазирлик матбуот хизмати “Сўнгги қўнғироқ” тадбирларида валс тушиш тақиқланиши борасида ҳеч қандай ҳужжат йўқ. Бироқ фарзандлари дарсдан сўнг қолиб рақс тушишни ўрганиши, тадбир учун қиммат кийимлар тиктириш, бунинг учун пул йиғиш ҳолатлари ота-оналар ҳақли эътирозларига сабаб бўлаётганини “Дарё”га билдириб ўтганди.
Изоҳ (0)