Руминиядаги президентлик сайловларининг иккинчи босқичида Бухарестнинг либерал-прогрессив мери Никушор Дан ғалаба қозонди. Натижалар Prezenta.roaep.ro. сайтида эълон қилинди.
У сайловда мухолифатдаги “Руминларни бирлаштириш учун альянс” (АУР) партияси етакчиси Жорже Симеонни ортда қолдирди. Никушор Дан 6,1 миллиондан ортиқ (53,60 фоиз), Симеон эса 5,3 миллиондан ортиқ (46,40 фоиз) овоз тўплади. Симеон ижтимоий тармоқларда мағлубиятни тан олган видеомурожаатини жойлаштирди, шунингдек, Данни ғалаба билан табриклади.
Дастлаб сайловлар 2024 йилнинг ноябрь ва декабрь ойларида бўлиб ўтиши керак эди. Бироқ ўшанда Руминия Конституциявий суди россияпараст номзод ҳисобланган Калин Жоржеску ғалаба қозонган сайловларнинг биринчи босқичи натижаларини бекор қилди ва янги овоз беришни май ойига белгилади.
Янги овоз беришнинг биринчи босқичи 4 май куни бўлиб ўтди. Иккинчи босқичга Симеон деярли 41 фоиз овоз ва Дан тахминан 21 фоиз овоз билан ўтганди.
Бу Европа ва Украина учун нимани англатади?
Никушорни аллақачон Украина президенти Владимир Зеленский ғалаба билан табриклаган.
Украина учун қўшни ва дўст сифатида Руминия ишончли ҳамкор бўлиши муҳим. Биз ишонамизки, у бўлади. Ҳамкорликда биз мамлакатларимизни ҳам, Европамизни ҳам кучлироқ қила оламиз, деган Зеленский.
Никушор Дан Украинага ёрдам бериш ва Руминиянинг Европа Иттифоқига чуқур интеграциялашуви тарафдори. Руминия Украинани қўллаб-қувватлашда стратегик мавқега эга. Кенг кўламли уруш бошланганидан кейин мамлакат Украина донини экспорт қилиш учун асосий муқобил йўналишга айланди — Констанса порти орқали миллионлаб тонна қишлоқ хўжалиги маҳсулотлари ўтади. Руминия ҳарбий-денгиз флоти Қора денгиз ҳудудини миналардан тозалаш операцияларида қатнашиб, кемалар қатнови хавфсизлигини таъминламоқда.
НАТОнинг учта йирик ҳарбий ҳаво базаси ва мамлакат ҳудудида жойлаштирилган АҚШнинг ракеталарга қарши мудофаа тизимлари Украина, Молдова чегаралари ҳамда Қора денгиз минтақаси устидаги ҳаво ҳудудини ҳимоя қилишда муҳим рол ўйнайди. Шунингдек, Руминия ҳудудида Европадаги Ф-16 учувчилари тайёргарлик маркази фаолият юритмоқда, бу ерда украин ҳарбийлари тайёргарликдан ўтмоқда.
Никушор Дан Украинага ёрдам беришда давом этиш кераклигини бир неча бор таъкидлаган: унинг сўзларига кўра, Киевнинг урушдаги ғалабаси бутун минтақа манфаатларига мос келади.
Никушор Дан фаолияти
1987 ва 1988 йилларда халқаро математика олимпиадаларида қатнашиб, мутлақ натижалар билан биринчи ўринни эгаллаган. У Бухарест университетида математика йўналишида таҳсил олган.
1992 йилда математикани чуқурроқ ўрганиш учун Францияга кўчиб ўтган: Париждаги энг нуфузли олий ўқув юртларидан бири бўлган Олий нормал мактабда таҳсил олиб, магистр даражасини олган. 1998 йилда Париж-Шимол XIII университетида математика фанлари доктори даражасини қўлга киритган.
У Руминия Фанлар академияси Математика институти таркибида, Франциядаги Олий нормал мактаб намунаси асосида ташкил этилган Școala Normală Superioară București университетининг асосчиларидан бири бўлган ва унинг биринчи маъмурий директори сифатида ишлаган. 2011 йилда математика профессори унвонига сазовор бўлган. 2020 йилда Руминиядаги маҳаллий сайловлар натижаларини сарҳисоб қилгандан сўнг Бухарестнинг примари бўлган.
Изоҳ (0)