Ijtimoiy tarmoqlarda maktab direktori o‘quvchilarni barchani oldida kaltaklagani haqida xabarlar tarqaldi. Holat yuzasidan Bolalar ombudsmani izoh berdi.
Aniqlanishicha, 25-fevral kuni Navoiy viloyatining Xatirchi tumanidagi maktab direktori Q.J (1988-yilda tug‘ilgan erkak) 10-sinf o‘quvchilari N.T., A.A. (2008-yilda tug‘ilgan, o‘g‘il bolalar)larni go‘yoki tartibga chaqirish vaji bilan kaltakladi.
Direktor o‘quvchilar tanasining turli qismlarini mushtlab, oyoqlari bilan tepib do‘pposlagan.
Hozirda holat yuzasidan tergovga qadar tekshiruv harakatlari olib borilmoqda.
O‘quvchilarga yetkazilgan tan jarohati bo‘yicha sudga oid tibbiy ekspertiza tayinlandi.
Maktabdagi janjallar
Avvalroq Sirdaryoda o‘qituvchi 1-sinf o‘quvchisini qo‘liga igna sanchish bilan jazolangani haqida xabarlar tarqalgandi. Surishtiruv davomida yuqoridagi holat tasdig‘ini topmagan.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
Tanganing ikkinchi tomoni: o‘qituvchiga tazyiq o‘tkazish holatlari
2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi. Sentyabr oyida Surxondaryoda maktab direktori o‘qituvchining yaqin qarindoshlari tomonidan kaltaklangandi. Mazkur holatlar yuzasidan huquqbuzarlarga qilmishidan kelib chiqqan holda jazo choralari ko‘rilgan.
Izoh (0)