Ijtimoiy tarmoqlarda Qashqadaryodagi maktablarning birida o‘quvchilar bir-biriga bo‘yoq sepgani aks etgan video tarqaldi. Holat viloyat Maktabgacha va maktab ta’limi boshqarmasi tomonidan o’rganildi.
Unga ko‘ra, holat joriy yil 12-may kuni Chiroqchi tumanidagi 82-sonli maktabning 8-10 sinf o‘quvchilari o‘rtasida sodir etilgan. Tanaffusda o‘quvchilar o‘zaro bo‘yoq laklarini bir-biriga sepish, maktab devoriga ta’sir etganlik holati kuzatilgan.
Maktab ma’muriyatining ma’lum qilishicha, mazkur holatni keltirib chiqargan o‘quvchilarning ota-onalariga nisbatan huquq tartibot organlari tomonidan ma’muriy bayonnoma rasmiylashtirilgan.
Qayd etilishicha, video ota-onalarni farzand tarbiyasiga e’tiborli bo‘lish maqsadida maktabning mas’ul xodimi tomonidan ularga yuborilgan. Bu esa ijtimoiy tarmoqlarda noto‘g‘ri talqin qilinishga urinilgan.
Shuningdek, ta’lim tashkiloti mulki, moddiy-texnik bazasiga ziyon yetkazish holatlari g‘ayriqonuniy harakat hisoblanishini inobatga olib, o‘z navbatida e’tiborsizlik holatlarini yuzaga keltirgan sinf rahbarlari, maktab ma’muriyatiga nisbatan ta’sir chorasi qo‘llanilgani ma’lum qilindi.
Chiroqchi tumanidagi 82-sonli maktab direktori bu kabi salbiy holatlarni oldini olish maqsadida tezkorlik bilan huquq tartibot organlariga murojaat qilib, farzand tarbiyasiga e’tiborli bo‘lishni so‘ragan.
Maktabdagi janjallar
Avvalroq Sirdaryoda o‘qituvchi 1-sinf o‘quvchisini qo‘liga igna sanchish bilan jazolangani haqida xabarlar tarqalgandi. Surishtiruv davomida yuqoridagi holat tasdig‘ini topmagan.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
Tanganing ikkinchi tomoni: o‘qituvchiga tazyiq o‘tkazish holatlari
2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi. Sentyabr oyida Surxondaryoda maktab direktori o‘qituvchining yaqin qarindoshlari tomonidan kaltaklangandi. Mazkur holatlar yuzasidan huquqbuzarlarga qilmishidan kelib chiqqan holda jazo choralari ko‘rilgan.
Izoh (0)