Эрон президенти Масъуд Пезешкиён ҳижоб масаласини куч билан ҳал этиб бўлмаслигини айтди. Бу ҳақда у журналистлар билан учрашувда маълум қилди.
Пезешкиён аёлларни ҳижоб ўрашга мажбурлаш ҳам, уни тақишдан қайтариш ҳам нотўғри эканини айтди. У бу масалани маданиятни ривожлантириш орқали ҳал қилиш кераклигини билдирди. Президент масжидлар маданиятни шакллантириш функциясини бажариши кераклигини таъкидлади. Жумладан, ҳижоб муаммосини қарама-қаршилик билан эмас, балки мантиқий йўл билан ҳал қилиш кераклигини қўшимча қилди.
Бу сиёсатчининг мажбурий ҳижобга қаршилик билдирганига оид биринчи ҳолат эмас. У сайловолди кампанияларидан бири Ахлоқ полициясига қарши чиққан. Пезешкиён “аёллар ва қизларни мажбурлашга ҳаққимиз йўқ ва мен уларга нисбатан бундай хатти-ҳаракатлардан уяламан” деган эди.
Эрон ҳукумати президент Масъуд Пезешкиённинг сайловолди ваъдаларига зид равишда “иффат ва ҳижоб тўғрисида”ги қонун лойиҳасини жорий қилаётган эди. Янги қоидалар нафақат сочларни кўрсатишни тақиқлайди, балки бўйин, билаклар ёки тўпиқларни беркитиш мажбуриятини ҳам юклайди.
Биринчи қоидабузарлик учун аёл 155 евро миқдорида жарима тўлайди. Агар қоидабузарлик такрорланса, жарима сезиларли даражада ошиши мумкин.
Жаримага қарши танқид ёки норозилик қўшимча жарима жазосини юклайди, унга кўра қоидабузар 155 еврогача пул тўлаши шарт. 9 ёшдан бошлаб рўмол тақиш мажбурийдир. Агар вояга етмаган қиз қонунни бузса, ота-она жавобгарликка тортилади ва қизга нисабатан “тарбиявий чоралар” кўрилади.
Масъуд Пезешкиён юқоридаги қонун янги ижтимоий ғалаёнларни келтириб чиқариши мумкинлигидан хавотирланиб, унга вето қўйганди.
Изоҳ (0)