Куба президенти Мигел Диас-Канел Америка раҳбари Дональд Трампнинг Иккинчи жаҳон урушидаги ғалабада АҚШ ҳал қилувчи рол ўйнагани ҳақидаги баёнотини ксенофобик деб баҳолади. Бу ҳақда у Russia Today нашри билан суҳбатда маълум қилган.
Куба президенти шундай ғояларни илгари сураётган кишилар Кубага нисбатан қамални кучайтириш ва уни террорчи давлатлар рўйхатига киритиш ғоясини ҳам қўллаб-қувватлаётганига эътибор қаратган.
“Худди шу одамлар қамалнинг кучайтирилишини ва Кубанинг террорчи давлатлар рўйхатига киритилишини истайди. Қамал орқали бутун бир халқни қирғин қилишга маҳкум этиш фашизмнинг бир кўриниши эмасми? Айнан шу одамлар шунча йиллардан бери НАТОнинг Россия чегараларигача кенгайишини қўллаб-қувватлаб келмоқда”, дея таъкидлади Мигел Диас-Канел.
Шунингдек, Диас-Канел Ғарб русофобияни келтириб чиқарганини ва СССРнинг ҳиссасини бузиб кўрсатиш ҳамда қадрсизлантиришга уринишда давом этаётганини алоҳида қайд этган.
Май ойи бошида АҚШ президенти Дональд Трамп 8 май ва 11 ноябрни Биринчи ва Иккинчи жаҳон урушларидаги Ғалаба кунлари сифатида нишонланишини эълон қилди. Бунга сабаб сифатида АҚШнинг Иккинчи жаҳон урушидаги ғалабага қўшган ҳиссасини энг катта деб баҳоланишини билдирди.
8 май куни эса 8 майни Ғалаба куни деб эълон қилган ҳужжатни имзолаш маросимида Иккинчи жаҳон урушидаги ғалабага АҚШ сабабли эришилганини маълум қилди.
“Бутун дунёда Иккинчи жаҳон урушидаги иттифоқчилар бу ҳафта байрам қилишмоқда, аммо АҚШ бу кунни ҳеч қачон чинакамига нишонламаган, гарчи ғалаба асосан биз туфайли қўлга киритилган бўлса-да. Хоҳлайсизми-йўқми, биз бу урушга кирдик ва уни ютиб чиқдик. Бизга кўплаб буюк иттифоқчилар ёрдам берди, бироқ ўйлайманки, ҳеч ким айнан биз устун куч бўлганимизни инкор этмайди”, деди Трамп.
Изоҳ (0)