АҚШ президенти Дональд Трамп Иккинчи жаҳон урушидаги ғалабага АҚШ сабабли эришилганини маълум қилди. Бу ҳақда у 8 майни Ғалаба куни деб эълон қилган ҳужжатни имзолаш маросимида айтиб ўтди.
Бутун дунёда Иккинчи жаҳон урушидаги иттифоқчилар бу ҳафта байрам қилишмоқда, аммо АҚШ бу кунни ҳеч қачон чинакамига нишонламаган, гарчи ғалаба асосан биз туфайли қўлга киритилган бўлса-да. Хоҳлайсизми-йўқми, биз бу урушга кирдик ва уни ютиб чиқдик. Бизга кўплаб буюк иттифоқчилар ёрдам берди, бироқ ўйлайманки, ҳеч ким айнан биз устун куч бўлганимизни инкор этмайди, деди Трамп.
Оқ уй сайтидаги ҳужжатга кўра, шу куни Америка халқи “ўз ватани, эркинлиги ва Ғарб цивилизациясининг омон қолиши учун” ҳалок бўлганларнинг барчасини хотирлайди.
Америка аскарларининг қурбонларисиз бу урушда ғалаба қозониб бўлмас эди ва бугунги дунё бутунлай бошқача кўринишда бўларди, дейилади ҳужжатда.
АҚШ президенти 8 майни Иккинчи жаҳон урушида қозонилган Ғалаба куни ва 11 ноябрни Биринчи жаҳон урушида қозонилган Ғалаба куни деб эълон қилганди. У Американинг кўплаб иттифоқчилари аллақачон 8 майни нишонлаётганини, бироқ айнан АҚШ ғалабани таъминлаш учун “бошқа ҳар қандай давлатдан кўпроқ” иш қилганини айтганди.
Биз иккала урушда ҳам ғалаба қозондик. Куч-қудратда, жасоратда, ҳарбий маҳоратда бизга ҳеч ким яқин бўлмаган, деган у.
Трамп январь ойида Россия АҚШга Иккинчи жаҳон урушида ғалаба қозонишда ёрдам берганини айтганди.
Изоҳ (0)