Kuba prezidenti Migel Dias-Kanel Amerika rahbari Donald Trampning Ikkinchi jahon urushidagi g‘alabada AQSH hal qiluvchi rol o‘ynagani haqidagi bayonotini ksenofobik deb baholadi. Bu haqda u Russia Today nashri bilan suhbatda ma’lum qilgan.
Kuba prezidenti shunday g‘oyalarni ilgari surayotgan kishilar Kubaga nisbatan qamalni kuchaytirish va uni terrorchi davlatlar ro‘yxatiga kiritish g‘oyasini ham qo‘llab-quvvatlayotganiga e’tibor qaratgan.
“Xuddi shu odamlar qamalning kuchaytirilishini va Kubaning terrorchi davlatlar ro‘yxatiga kiritilishini istaydi. Qamal orqali butun bir xalqni qirg‘in qilishga mahkum etish fashizmning bir ko‘rinishi emasmi? Aynan shu odamlar shuncha yillardan beri NATOning Rossiya chegaralarigacha kengayishini qo‘llab-quvvatlab kelmoqda”, deya ta’kidladi Migel Dias-Kanel.
Shuningdek, Dias-Kanel G‘arb rusofobiyani keltirib chiqarganini va SSSRning hissasini buzib ko‘rsatish hamda qadrsizlantirishga urinishda davom etayotganini alohida qayd etgan.
May oyi boshida AQSH prezidenti Donald Tramp 8-may va 11-noyabrni Birinchi va Ikkinchi jahon urushlaridagi G‘alaba kunlari sifatida nishonlanishini e’lon qildi. Bunga sabab sifatida AQSHning Ikkinchi jahon urushidagi g‘alabaga qo‘shgan hissasini eng katta deb baholanishini bildirdi.
8-may kuni esa 8-mayni G‘alaba kuni deb e’lon qilgan hujjatni imzolash marosimida Ikkinchi jahon urushidagi g‘alabaga AQSH sababli erishilganini ma’lum qildi.
“Butun dunyoda Ikkinchi jahon urushidagi ittifoqchilar bu hafta bayram qilishmoqda, ammo AQSH bu kunni hech qachon chinakamiga nishonlamagan, garchi g‘alaba asosan biz tufayli qo‘lga kiritilgan bo‘lsa-da. Xohlaysizmi-yo‘qmi, biz bu urushga kirdik va uni yutib chiqdik. Bizga ko‘plab buyuk ittifoqchilar yordam berdi, biroq o‘ylaymanki, hech kim aynan biz ustun kuch bo‘lganimizni inkor etmaydi”, dedi Tramp.
Izoh (0)