АҚШга бориш мақсадида Мексикага келаётган ноқонуний мигрантлар ўз ватанларига қайтариб юборилади. Бу ҳақда Мексика президенти Клаудия Шейнбаум маълум қилди.
Марказий Американинг барча мамлакатлари, айниқса Гватемала билан келишув мавжуд ва яқинда шу мақсадда учрашув ҳам бўлиб ўтди. Куба билан ҳам келишувга эришилган. Ноқонуний мигрантлар Мексика ҳудудига эмас, балки келган жойларига бевосита қайтарилиши лозим, деди Шейнбаум.
У Мексикадаги ноқонуний муҳожирларга инсонпарварлик ёрдами ҳам кўрсатилишини маълум қилди.
Агар бу одамлар Мексика ҳудудида бўлса, биз уларга гуманитар нуқтаи назаридан эътибор қаратамиз, аммо миграция сиёсатимиз доирасида уларнинг ватанларига қайтишини хоҳлаймиз, чунки улар чет эл фуқароларидир, деди Шейнбаум.
Президентнинг айтишича, Мексика ҳукумати АҚШ расмий вакиллари билан мигрантларнинг аҳволи юзасидан музокаралар олиб бормоқда. У ҳокимият тепасига келганидан буён, биринчи навбатда, мигрантларнинг ихтиёрий равишда ватанларига қайтишини рағбатлантириб келаётганини қўшимча қилди.
Трампнинг миграция сиёсати
Трамп 21 январь куни чегарадаги барча ноқонуний ўтиш жойлари ёпилишини таъкидлади. У АҚШ жанубий чегараси орқали ноқонуний мигрантларнинг киришини тақиқлаш тўғрисидаги фармонни имзолади. Бошпана излаш баҳонаси билан у ерда қолиш ҳуқуқини чеклади.
Президент Ички хавфсизлик вазирлиги, Адлия вазирлиги ва Давлат департаментига АҚШга жанубдан ноқонуний кираётганларни чиқариб юбориш чораларини кўришни топширди. Пентагон чегарага қўшимча 1,5 минг аскар ва вертолётлар юборилишини эълон қилди. Шунингдек, 5 мингдан ортиқ ноқонуний мигрантларни депортация қилиш учун авиация тақдим этилади, уларнинг оқими ва ноқонуний савдосини тўхтатиш учун вақтинчалик ва доимий тўсиқлар қурилади.
Изоҳ (0)