Германия ҳукумати Украинага IRIS-Т ҳаво ҳужумидан мудофаа тизимлари учун ракеталар, артиллерия ўқ-дорилари, турли хил дронлар, муҳандислик таъминоти воситалари, зирҳли транспорт воситалари ва бошқа техникалардан иборат кенг кўламли ҳарбий ёрдам пакетини топширди.
Украина IRIS-Т SLМ зенит-ракета тизимлари учун ракеталар; Leopard 2 танклари учун ўқ-дорилар; 155 мм калибрли 27 мингта артиллерия снаряди; 122 мм калибрли 1 мингта артиллерия ўқ-дориларини олган. Эҳтиёт қисмлар тўпламига эга 70 та Vector разведка дронлари; 150 та HF-1 қуролли дронлар; 20 та ерусти робот платформалари; 6 та зирҳли Bergepanzer 2 эвакуация машинаси (эҳтиёт қисмлар билан) етказиб берилган.
Бундан ташқари, Киевга 4 та WISENТ 1 миналарни тозалаш машинаси эҳтиёт қисмлари билан бирга
- 2 та муҳандислик плуги (ерости миналарини тозалаш учун),
- 41 та ер усти кузатув радар станцияси,
- ўнлаб ёрдамчи ускуналар — лазерли масофа ўлчагичлар,
- инфрақизил бинокллар,
- ғаввос скутерлар,
- чегара хизматлари эҳтиёжи учун автомобиллар,
- RGW 90 типидаги танкка қарши гранатамётлар,
- G3 ва МK 556 милтиқлари юборилган.
Берлин йилнинг биринчи ярмида Киевни ҳарбий қўллаб-қувватлаш ҳажмини сезиларли даражада кенгайтиришни режалаштирганди. Янги ҳаво ҳужумидан мудофаа тизимлари, танклар ва гаубитсаларни топшириш кутилмоқда.
Март ойидаёқ Германия ҳукумати ҳарбий ёрдам рўйхатини янгилади: унга учта янги Gepard зенит қурилмаси, IRIS-Т учун қўшимча ракеталар ва ўқ-дорилар партияси киритилган. Ўша ойда Германия президенти Франк-Валтер Штайнмаер мудофаа соҳаси ва инфратузилмага катта сармоя киритишни назарда тутувчи қонунни имзолаган. Ҳужжат, хусусан, Украинани ҳарбий қўллаб-қувватлаш учун 3 миллиард евро ажратишни блокдан чиқарган.
2024 йил октябрь ойида Христиан-демократик иттифоқи етакчиси ва ўша пайтдаги канцлерликка номзод Фридрих Мерц Украинага Taurus қанотли ракеталарини етказиб беришни фаол қўллаб-қувватлаганди. Бироқ вақт ўтиши билан унинг риторикаси юмшаган: декабрь ойида у бу каби қарорлар АҚШ ва Европа Иттифоқи иттифоқчилари билан маслаҳатлашгандан кейин қабул қилинишини айтган.
2025 йил февраль ойида эса Мерц Украинага Taurus ракеталарини беришни ёқлаётганини, бироқ бунга барча Европа иттифоқчилари рози бўлса, амалга оширилиши мумкинлигини билдирган. 7 май куни, аллақачон федерал канцлер мақомида бўлганида, у янги Германия ҳукумати Украинага Taurus ракеталарини етказиб бериш масаласида таянч бўлишини маълум қилди.
Изоҳ (0)