АҚШ Кубага қарши санкцияларни юмшатди, Венесуэлага қўйилган чекловларнинг ҳам бир қисмини олиб ташламоқчи

АҚШ Молия вазирлиги Кубага қарши киритилган санкцияларни юмшатди — гуруҳли таълим саёҳатлари ва конференцияларда қатнашиш учун сафарларга рухсат берилди, қариндошларга пул ўтказиш лимити олиб ташланди. Санкцияларнинг юмшатилиши ҳақида Лос-Анжелесдаги Америка саммити фонида эълон қилинди (унга Куба таклиф этилмаган). Шунингдек, АҚШ Венесуэладаги сиёсий инқироз бартараф этилса, унга нисбатан ҳам санкцияларнинг бир қисмини бекор қилиш масаласини кўриб чиқмоқда. Бу ҳақда АҚШ президенти Жо Байден саммитга мамлакат вакили сифатида келган Венесуэла мухолифати етакчиси Хуан Гуайдога маълум қилди.

«Кубага гуруҳли таълим сафарлари учун рухсат берилди, таълим фаолиятидаги бир қатор чекловлар олиб ташланди, Кубадаги профессионал учрашувлар ва конференцияларда қатнашиш ёки мамлакатда уларни ўтказиш учун сафарга рухсат берилди, қариндошларга пул ўтказмаларидаги чеклов олиб ташланди, шунингдек, Кубага хайрия қилишга рухсат берилди», — дейилади АҚШ Молия вазирлиги веб-сайтида эълон қилинган Куба активларини назорат қилиш бўйича тузатишларда. Июнь ойи бошида АҚШ «кубаликларни қўллаб-қувватлаш зарурлиги»ни таъкидлаб, Куба билан ҳаво қатновига қўйилган чекловларни бекор қилганди.

Оқ уйга кўра, Жо Байден Хуан Гуайдо билан учрашувда Вашингтон Каракасга нисбатан санкцияларни юмшатишга тайёрлигини маълум қилган. «Президент Байден АҚШ Венесуэла халқига ўз мамлакати келажагини белгилаш имконини берадиган музокаралар натижаларига кўра санкциялар сиёсатини ўзгартиришга тайёрлигини яна бир бор тасдиқлади», — дейилади Оқ уй баёнотида.

АҚШ Гуайдони Венесуэла президенти деб билади, сўнгги сайловда ғалаба қозонганини эълон қилган Николас Мадурони эса тан олмайди. Венесуэлага қарши оғир санкциялар мавжуд, улар, жумладан, нефть экспортига ҳам таъсир қилади. Аввалроқ АҚШ молия вазирлиги Американинг Chevron нефть компаниясига Венесуэладаги келгуси фаолияти бўйича музокараларни бошлаш имконини берувчи лицензия берган эди. Reuters хабарига кўра, Қўшма Штатлар Россияга қарши санкцияларнинг Европа учун оқибатларини юмшатиш мақсадида Венесуэла нефтига нисбатан санкцияларни юмшатиш ниятида.