Украина жаҳон савдосидаги бўлиниш ва Европа давлатлари билан алоқаларнинг кучайиб бораётгани сабабли АҚШ долларидан воз кечиб, еврога ўтмоқчи. Бу ҳақда Украина Миллий банки раҳбари Андрей Пишний Reuters агентлигига берган интервьюсида маълум қилди.
Пишнийнинг сўзларига кўра, Европа Иттифоқига аъзо бўлиш истиқболи, Евроиттифоқнинг Украина мудофаасини таъминлашдаги роли, глобал бозорлардаги ўзгарувчанлик ва халқаро савдонинг бўлиниб кетиш эҳтимоли бунга туртки бўлмоқда. Миллий банк Украина гривнаси учун доллар ўрнига евро асосий валюта бўлиши кераклигини кўриб чиқди.
Бу мураккаб иш бўлиб, сифатли ва ҳар томонлама тайёргарликни талаб этади, деди Пишний.
У ҳозирча АҚШ доллари билан амалга оширилаётган операциялар ҳамон валюта бозорининг барча сегментларида устунлик қилаётганини айтди. Бироқ еврода ифодаланган операциялар улуши кўплаб йўналишларда ўсиб бораётганини қўшимча қилди.
АҚШ доллари — бугунги вазият қандай?
Доллар халқаро савдода етакчи валюта бўлиб қолмоқда, шунингдек, глобал захиравий валюталарнинг катта қисмини ташкил этади. Масалан, Саудия Арабистони ва Гонконг каби йирик иқтисодиётлар ўз валюталарини долларга нисбатан барқарор ушлаб турмоқда.
Бироқ Дональд Трамп президентлиги даврида АҚШ глобал савдо урушини бошлаб, охирги юз йилликдаги энг юқори бож ставкаларини жорий қилди. Бу эса айрим экспертларда долларнинг глобал захиравий валюта сифатидаги келажагига шубҳа уйғотди.
Шунингдек, Трамп Оқ уйга қайтганидан бери доллар курси асосий валюталарга нисбатан 9 фоиздан кўпроққа пасайган. Чунки инвесторлар Америка активларига эгалик қилишдан бош тортмоқда.
Изоҳ (0)