Мексикалик муҳожирларнинг янги карвони АҚШ президенти Дональд Трампнинг кутилаётган қаттиқ миграция сиёсатига қарамасдан, АҚШга йўл олди, деб хабар бермоқда CNN иммиграция идораларига таяниб.
Телеканал маълумотларига кўра, Венесуэла, Колумбия, Эквадор, Куба ва бошқа давлатларнинг, тахминан, 3 минг нафар фуқароси жорий йилнинг 20 январь кечаси Мексиканинг жанубидаги Тапачула шаҳридан йўлга чиқди.
Трампнинг қасамёд маросими 20 январда бўлиб ўтди. Сайловолди йиғилишларида у миллионлаб ноқонуний муҳожирларни чиқариб юбориш бўйича “Америка тарихидаги энг йирик амалиёт”ни бошлашни, шунингдек, айрим мамлакатлардан келган фуқароларнинг кириш тақиқини қайта жорий этиш ва қочоқларни қабул қилишни тўхтатиш орқали АҚШ давлат чегарасини “муҳрлаш”ни ваъда қилди.
Бундан ташқари, Трамп “Мексикада қол” дастурини қайта тиклашини айтди, унинг доирасида бошпана сўраб мурожаат қилганлар қўшни давлатдаги иши бўйича Америка ҳукуматининг қарорини кутишлари керак эди.
Полиция ва хавфсизлик кучлари Трампнинг инаугурациясидан сўнг деярли дарҳол АҚШ ва Мексика чегарасини ёпишни бошлади. Тадбир давомида АҚШнинг янги раҳбари икки давлат чегарасида фавқулодда ҳолат эълон қилишини ва ноқонуний мигрантларни ушлаб туриш учун ҳарбийлардан фойдаланишини маълум қилди.
20 январь куни АҚШнинг янги маъмурияти мигрантларга АҚШга қонуний равишда кириш имконини берувчи CBP One иловасини ёпди — бу Америкага кўчиб ўтишни хоҳловчилар учун асосий йўл. CNN нашрининг ёзишича, бу туфайли Трамп жамоасига аллақачон суд жараёни таҳдид солмоқда. Америка фуқаролик эркинликлари иттифоқи бошпана бериш бўйича чекловлар тўғрисидаги иш бўйича ариза берди.
АҚШ президенти, шунингдек, мигрантларга нисбатан эътирози йўқлигини айтди.
“Мен бунга қарши эмасман. Қонуний миграцияга эътирозим йўқ. Бизга ишчи кучи керак. Мен бунга яхши муносабатдаман. Мигрантларга эҳтиёжимиз бор. Турли божлардан қочиш учун АҚШга кўплаб компаниялар келади. Агар сиз катта божларни тўлашни хоҳламасангиз, ўзингизнинг заводингизни АҚШда қуришингиз керак. Шунинг учун бизнинг юртга кўплаб ишчилар келади”, деди Трамп.
Изоҳ (0)