Уч йилдан ортиқ вақтдан бери Украинада жанг қилаётган Россия армиясининг йўқотишлари 950 минг кишига етди. Бу ҳалок бўлганлар ва ярадорларни ўз ичига олади. Бу ҳақда Буюк Британия Мудофаа вазирлиги ҳарбий разведкаси хабар берди.
Вазирлик ҳисоб-китобларига кўра, 2025 йилнинг дастлабки тўрт ойида Россия армиясининг умумий йўқотишлари, тахминан, 160 000 кишини ташкил этган.
Агар бундай суръат йил охиригача сақланиб қолса, бу Россия учун шахсий таркибдаги йўқотишлар бўйича урушнинг энг қиммат йили бўлади, дея таъкидлади қироллик Мудофаа вазирлиги.
Таъкидланишича, 2025 йилда кунлик йўқотишларнинг юқори даражасига қарамай, Россия Украина ҳудудининг сезиларли қисмини назорат қила олмаган. Апрель ойида Россия Қуролли кучлари кунига ўртача 1200 дан ортиқ одамни йўқотган. Март ойида бу кўрсаткич 1300 нафарни ташкил этган.
Аввалроқ Халқаро стратегик тадқиқотлар институти уруш бошланганидан бери Россия армиясининг йўқотишларини ярадорлар билан ҳисоблаганда деярли 800 минг кишига баҳолаганди. Шу билан бирга, Россия армиясига ҳар ойда 30-40 минг киши ёлланаётгани айтилмоқда. Уларга таклиф этилаётган йирик бонуслар ва кучайтирилган ҳарбий тарғибот бу кўрсаткич ошишига таъсир қилган.
Forbes ҳисоб-китобларига кўра, Россия қўшинларига ҳужум ва йўқотишларнинг ҳозирги суръатини сақлаб қолган ҳолда Украинанинг ҳали босиб олинмаган ҳудудларини эгаллаш учун тахминан 230 йил керак бўлади. Бу деярли 490 минг кв/км ёки Украинанинг 81 фоизига тенг. Шу билан бирга, тахминан 101 миллион россиялик ҳарбий ҳалок бўлади.
Украинага қарши урушда мингдан ортиқ Ўзбекистон фуқароси жанг қилмоқда
Камида 1110 нафар Ўзбекистон фуқароси Россия Қуролли кучлари билан шартнома тузган. Бу рўйхат тўлиқ эмас: Россия ёки бошқа давлат фуқаролигига эга бўлган этник ўзбеклар ҳисобга олинса, уларнинг умумий сони бир неча мингга етиши мумкин. Бу ҳақда Украинанинг “Хочу жить” (“Яшашни истайман”) лойиҳаси маълум қилди.
Россия Қуролли кучлари билан шартнома тузганлар орасида камида 109 киши ҳалок бўлган. Улар орасида энг ёши 21 ёшга тўлмаган, энг каттаси 62 ёшда. Ҳалок бўлганлардан бири шартнома имзолаганидан кейин 8 кун ҳам яшамаган.
Зўрлик билан урушга олиб кетилган, Донецкдаги жангларда қатнашаётган ўзбекистонлик йигит билан суҳбатни ҳаволага босиб ўқишингиз мумкин.
Ўзбекистон фуқароларига чет давлатларининг ҳарбий хизматига ёлланиш қонунан тақиқланади!
Ўзбекистон фуқаролари чет давлатларнинг (шу жумладан, Россиянинг) ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёллангани учун Ўзбекистон Жиноят кодексининг 154,1-моддасига кўра 3 йилдан 5 йилгача озодликни чеклаш ёки озодликдан маҳрум қилиш билан жазоланади.
Изоҳ (0)