Россиянинг Украинага кенг кўламли босқини бошланганидан бери 20 дан ортиқ рус генерали ҳалок бўлди, деб ёзмоқда Nikkei Япония разведкасининг АҚШ ва Европа давлатлари билан ҳамкорликда олинган маълумотларига таяниб.
Nikkei келтирган версиялардан бирига кўра, Украина армияси мобил телефон сигналлари орқали рус генералларини топишга муваффақ бўлган. Бошқа версияга кўра, бунда Донбасснинг босиб олинган ҳудудларидаги Украина томон маълумотчилар ёрдам берган, деди исмини ошкор этмаган юқори мартабали япон разведкачиси.
2022 йил августида Британия ҳарбий разведкаси Украинадаги урушда камида 10 нафар россиялик генерал ҳалок бўлганини маълум қилганди.
The New York Times газетасининг ёзишича, Қўшма Штатлар ва бошқа Ғарб давлатлари Россия босқинида 200 мингга яқин рус аскари ҳалок бўлган ёки яраланган, деб баҳоламоқда.
Россия Мудофаа вазирлиги охирги марта 2022 йил сентябрь ойида ўз йўқотишлари ҳақида хабар берганди. Ушбу маълумотларда 5 937 рус аскари ҳалок бўлгани айтилади. 9 февраль куни Украина Қуролли кучлари Бош штаби уруш бошланганидан бери 135 минг россиялик ҳалок бўлганини маълум қилди.
“Медиазона” ва BBC рус хизмати маълумотларига кўра, 2023 йил февраль ойи бошига келиб, очиқ манбалардан маълум бўлишича, урушда 13 мингдан ортиқ рус аскари, жумладан, тўрт нафар генерал ҳалок бўлган.
Изоҳ (0)