The New York Times газетаси АҚШ разведкасига таяниб ёзишича, Украинадаги уруш пайтида ҳар икки томондан 500 мингга яқин ҳарбий хизматчи ҳалок бўлган ва яраланган.
Шу билан бирга, америкалик расмийлар йўқотишларни ҳисоблаш қийинлигини таъкидлади, чунки Киев маълумотларни ошкор этмаяпти, Москва эса йўқотишлар ҳақида анча аввал ҳисобот берган, унда ҳам қурбонлар сонини камайтириб кўрсатган бўлиши мумкин.
АҚШ разведкасининг маълумотларига кўра, Россиянинг Украинадаги йўқотишлари 300 минг кишига етган. Бундан 120 минг аскар ҳалок бўлган, 180 минг киши ярадор бўлган
Украина армиясида эса ҳалок бўлганлар 70 минг кишини, ярадорлар 120 минг ҳарбийни ташкил этмоқда. Бу рақамларни мустақил экспертлар тасдиқлай олмайди.
2022 йил ноябрь ойида АҚШ Бош штаб бошлиғи Марк Милли ҳар икки томондан 100 мингдан ортиқ одам ҳалок бўлгани ва яраланганини айтганди. NYT таъкидлашича, қиш ва баҳорда қурбонлар ва ярадорлар сони кескин ошган, хусусан, Украина шарқидаги Бахмут атрофида бир неча ой давом этган шиддатли жанглар кўплаб йўқотишларга сабаб бўлган.
Бундан ташқари, ҳозирги қарши ҳужумда минглаб украиналик ҳарбийлар ҳалок бўлди ёки яраланди, деб ёзади газета АҚШ расмийларига таяниб.
Россиянинг йўқотишлар ҳақидаги расмий ҳисоботи
Россия Мудофаа вазирлиги охирги марта 2022 йил 21 сентябрда урушдаги йўқотишлар ҳақида расман ҳисобот берган эди. Ўшанда вазирлик 5 937 нафар россиялик ҳарбий ҳалок бўлганини эълон қилган.
Апрель ойида The New York Times АҚШ разведка хизматларининг интернетда тарқалган ҳужжатларига таяниб, Россия Федерал хавфсизлик хизмати мамлакат Мудофаа вазирлигини “Россиянинг Украинадаги йўқотишларини яширганликда айблаётгани” ҳақида хабар берди. Разведка хизмати маълумотларига кўра, вазирлик ўз ҳисоботларида Миллий гвардия жангчилари, “Вагнер” ёлланма аскарлари ва Чеченистондан Украинага юборилган ҳарбийлар орасидаги йўқотишларни ҳисобга киритмаяпти. ФХХнинг ўша пайтдаги версиясига кўра, Украинада ўлдирилган ва яраланган Россия ҳарбийлари сони тахминан 110 минг кишини ташкил қилади.
Изоҳ (0)