Британиянинг Халқаро стратегик тадқиқотлар институти (IISS) ҳисоботига кўра, Россия Украинадаги бир йиллик урушда замонавий танкларининг ярмидан айрилди. Бу ҳақда ҳисобот билан танишган Der Spigel нашри хабар берди.
Ҳисоботга кўра, уруш бошидан бери Россия урушдан олдинги Т-72B ва Т-72B3М танкларининг 50 фоизга яқинини, шунингдек, кўп сонли Т-80 танкларини йўқотган. Ушбу танклар Россия арсеналидаги энг замонавийларидан бири. Катта йўқотишлар туфайли рус армияси омборлардан хизматга қайтарилаётган эски жиҳозлардан фойдаланишга мажбур бўлган.
Бундан ташқари, ҳисоботда Россия авиациясининг йўқотишлари ҳақида ҳам хабар берилган, экспертлар буни урушдан олдинги даражага қараганда 6-8 фоизга кўп деб, баҳолаган. Баъзи самолёт моделлари орасида, масалан, Su-24М бомбардимончи ва Su-30SM қирувчи самолётларида эса йўқотишлар 10-15 фоизни ташкил қилади.
Уруш бошиданоқ Россия ҳарбий техникада жиддий йўқотишларга учради. Апрель ойида юзлаб танклар ва минглаб зирҳли техникалар йўқ қилингани ҳақида хабар берилганди. Урушнинг дастлабки босқичларида русларнинг йўқотишлари замонавий танкка қарши тизимлар билан қуролланган Украина ҳарбийларининг ҳаракатлари самарадорлиги, Россиянинг эса урушга умуман тайёр эмаслиги билан боғлиқ бўлган.
Oryx ҳарбий-таҳлил лойиҳасига кўра, уруш пайтида жами ҳисобда Россия 1 700 дан ортиқ танкни йўқотди. Улардан 1 020 таси йўқ қилинган, яна 550 га яқини Украина ҳарбийлари томонидан ўлжа қилиб олинган. Қолган танклар афтидан, ташлаб юборилган ёки шикастланган, чунки лойиҳада уларнинг келажакдаги тақдири ҳақида ҳеч қандай фотосурат ёки видео далил келтирилмаган.
Изоҳ (0)