Россия президенти Владимир Путин мамлакат армиясидаги шахсий таркибни қарийб 170 минг кишига ошириш ҳақидаги фармонни имзолади. Ҳужжат Кремль сайтида эълон қилинди.
Фармонга кўра, Россия Қуролли кучларининг штат даражаси 2 209 130 кишини, шу жумладан 1 320 000 нафар ҳарбий хизматчиларни ташкил қилади. Армиянинг штат таркиби тўғрисидаги олдинги фармонда (энди ушбу ҳужжат ўз кучини йўқотди) РФ Қуролли Кучларининг таркиби 2 039 758 киши, шу жумладан 1 150 628 нафар ҳарбий хизматчини ташкил этиши айтилган.
Россия Мудофаа вазирлиги армия сони “шартнома бўйича ҳарбий хизматни ўташ истагини билдирган фуқаролар” ҳисобига кўпайтирилишини маълум қилди.
“Бунда фуқароларни муддатли ҳарбий хизматга чақиришни сезиларли даражада ошириш режалаштирилмаган. Сафарбарлик учун ҳеч қандай асос йўқ”, — дейилади вазирлик хабарида.
Вазирлик армия сонининг кўпайишини “махсус ҳарбий операция ва НАТОнинг давомли кенгайиши билан боғлиқ таҳдидларнинг кучайиши” билан изоҳлади. Вазирлик бундай таҳдидларни альянснинг бирлашган қуролли кучларини Россия чегаралари яқинида тўплаш, қўшимча ҳаво мудофааси ва зарба берувчи қуролларни жойлаштириш, шунингдек, НАТОнинг тактик ядровий кучлари салоҳиятини ошириш деб ҳисоблайди.
“Ҳозирги шароитда қуролли кучларнинг жанговар кучи ва сонининг қўшимча оширилиши НАТО блокининг агрессив фаолиятига адекват жавобдир”, — деди Россия Мудофаа вазирлиги.
Ноябрь ойи охирида Буюк Британия Мудофаа разведкаси Россия кучлари сўнгги бир ярим ой ичида Украинадаги урушда энг кўп талафот кўрганини айтганди. Бу баёнот Украина Қуролли кучлари Бош штаби маълумотларига асосланган. Британия разведкаси Украина Қуролли кучларининг методологиясини тасдиқлай олмаслигини, аммо “агар ҳалок бўлганлар ва ярадорларнинг умумий сони олинса, бу қийматлар тўғри”, деб таъкидлади.
- Россиянинг Украинага босқини бошланганидан бери қанча ҳарбий хизматчи ҳалок бўлгани номаълум. Август ойида The New York Times газетаси Россия 120 мингга яқин ҳарбий хизматчиларини йўқотгани ва яна 170-180 минг ҳарбийни яралагани ҳақида хабар берган.
- Июль ойида Meduza ва “Медиазона” нашрлари Украинадаги урушнинг бир ярим йили давомида Россия армиясининг йўқотишлари бўйича қўшма тадқиқотини эълон қилганди. Статистик маълумотларга асосланган ҳисоб-китобларга кўра, 2022 йил 24 февралдан 2023 йил май ойининг охиригача Украинада 47 минг россиялик ҳарбий ҳалок бўлган.
- “Медиазона” журналистлари ва BBC рус хизмати кўнгиллилар жамоаси билан биргаликда қадар очиқ манбалардан 1 декабрга Украинадаги кенг кўламли уруш пайтида ҳалок бўлган 38 261 нафар россиялик ҳарбийнинг шахсини тасдиқлади.
Изоҳ (0)