Украинадаги урушда Россия қанча аскаридан айрилгани баҳоланди
АҚШ ва бошқа Ғарб давлатлари расмийлари Украинада ҳалок бўлган ва яраланган рус аскарлари сони 200 мингга яқинлашганини тахмин қилмоқда. Бу ҳақда The New York Times хабар берди.
Газетанинг ёзишича, Россия бир неча ойлардан бери шиддатли жанглар давом этаётган Бахмутда энг катта йўқотишларга дуч келган. Москва Донбасснинг шарқий қисмини эгаллашда калит ҳудуд деб биладиган ушбу шаҳарни олиш учун рус ҳарбийлари ёмон тайёргарликдан ўтган аскарлар ва собиқ маҳбуслардан фойдаланмоқда. NYT маълумотларига кўра, Россия ҳарбий муассасаси маҳбусларни харажат материаллари деб ҳисоблайди.
АҚШ Мудофаа вазирлиги юқори мартабали вакили Колин Калнинг сўзларига кўра, россиялик ҳарбийларнинг бундай тактикаси Россияда ўқ-дорилар, жумладан, артиллерия снарядлари тугаб қолгани билан боғлиқ. Руслар бу камомадни “маҳбусларни Бахмут ва Соледар каби жойларга жўнатиш” орқали тўлдирмоқда, деди вазирлик вакили.
Шу билан бирга, нашрнинг таъкидлашича, одамларини йўқотиш Владимир Путиннинг ҳарбий мақсадларини тўхтатиши қийин, чунки Москва “катта ғалабага муҳтож”.
“Аслида, Россиянинг йўқотишлари қанчалик катта бўлиши аҳамиятсиз, чунки уларнинг умумий инсон ресурслари Украинаникидан анча катта. Россияда аскарнинг ҳаёти ҳеч нарсага арзимайди. Бошқа томондан, ўлган аскар қандай ўлим топганидан қатъи назар, қаҳрамон ҳисобланади. Барча ҳалок бўлган аскарларнинг ўрни тўлдирилиши мумкин, қурбонлар сони эса уруш ҳақидаги жамоатчилик фикрини ўзгартирмайди”, — дея газета Эстония Мудофаа вазирлиги канцлери Кусти Салма сўзларини келтирди.
Украинанинг йўқотишлари ҳақида NYT АҚШ Қуролли кучлари штаб бошлиқлари бирлашган қўмитаси раҳбари Марк Миллининг баҳосига таянмоқда. 2022 йилнинг ноябрида у можаронинг ҳар икки томони 100 мингдан ортиқ одамидан айрилганини айтганди. Шу билан бирга, нашрнинг таъкидлашича, Бахмут учун жангларда Украинанинг йўқотишлари Россиянинг йўқотишлари билан тенг бўлиши мумкин.
Россия Мудофаа вазирлиги охирги марта 2022 йил сентябрда ўз йўқотишлари ҳақида хабар берганди. Ўша пайтда, Россия мудофаа вазири Сергей Шойгу урушда 5 937 нафар рус қўшини ҳалок бўлганини айтган.
“Медиазона”, BBC рус хизмати ва кўнгиллиларнинг аниқлашича, Россияда 17 январгача, очиқ манбаларга кўра, Украинага босқинда қатнашган 11 662 нафар россиялик аскарнинг ўлими тасдиқланган.
Украина Қуролли кучлари Бош штаби 23 январь кунги ҳисоботида Россия босқинида 121 мингдан ортиқ рус аскари ҳалок бўлганини маълум қилди. 2022 йил декабрда Украина президенти офиси уруш бошланганидан бери 10 мингдан 13 минггача украиналик ҳарбий ҳалок бўлганини хабар қилганди.
