Қиш яқинлашгани сабаб Россия билан урушнинг янги босқичи бошланяпти, деди Украина президенти Владимир Зеленский Associated Press агентлигига берган интервьюсида.
“Биз урушнинг янги босқичидамиз, бу ҳақиқат. Қиш урушнинг янги босқичига ўхшайди. Шуни айтишим мумкинки, қишда урушлар нафақат фронтда, балки шаҳарлар ичида ҳам олиб борилади”, — дейди Зеленский.
Украина можаронинг навбатдаги, хавфлироқ босқичига ўтаётгани ҳақида The Wall Street Journal ноябрь ўрталарида ёзганди. Ўшанда Украина Қуролли кучлари бош қўмондони Валерий Залужний Украинадаги жанглар боши берк кўчага кириб қолгани, уруш узоққа чўзиладиган позицион жангларга айланиб қолиш хавфи ҳақида огоҳлантирган. Бу вазият Украина армиясига ҳам, давлатнинг ўзига ҳам хавф туғдираётгани таъкидланган.
21 ноябрь куни Россия мудофаа вазири Сергей Шойгу россиялик қўшинлар гуруҳлари фаол мудофаа ишларини давом эттираётгани, бутун қўшма чизиқ бўйлаб позицияларни эгаллаб тургани ва ўз позицияларини босқичма-босқич яхшилаётганини айтди. Украина кучлари олдинга силжий олмаяпти, деди вазир. Россия Мудофаа вазирлиги маълумотларига кўра, ноябрь ойи бошидан бери Украина қуролли кучларининг йўқотишлари 13,7 минг кишини ташкил қилган.
Ёз бошидан бери Украина қарши ҳужум олиб бормоқда. Зеленский ҳужум қийин кечаётгани ва Украина Қуролли кучлари жиддий қаршиликка учраётгани ҳақида айтган.
Изоҳ (0)