Европа компаниялари Украинадаги уруш бошидан бери 100 млрд евро йўқотди

Россиянинг Украинага кенг кўламли босқини бошланганидан бери Европа компанияларининг Россиядаги фаолияти билан боғлиқ тўғридан тўғри йўқотишлари камида 100 миллиард еврони ташкил этди. Бу ҳақда Financial Times 600 та энг йирик компаниянинг молиявий ҳисоботига таяниб хабар бермоқда.

Нашрнинг ёзишича, Европанинг 176 та компанияси ўз активларининг амортизацияси, “биржа билан боғлиқ харажатлар”, шунингдек, бизнесни сотиш, ёпиш ёки қисқартириш билан боғлиқ харажатларга дуч келган.

Энг катта йўқотишлар, деб ёзади FT, энергетика корхоналарида кузатилган. Хусусан, BP, Shell va TotalEnergies жами 40,6 миллиард евро зарар кўрган. Бироқ нефть ва газ нархининг юқорилиги ортидан бу компаниялар зарарни фойда билан қоплашга муваффақ бўлган.

Шунингдек, молия компаниялари, жумладан банклар, суғурта ва инвестиция компаниялари катта зарар кўрди – улар 17 ярим миллиард еврога яқин йўқотди. Автомобиль ишлаб чиқарувчилари 13,6 миллиард евро миқдорида зарар кўрди.

Нашрнинг ёзишича, энг кўп зарар кўрган Европа компаниялари Британияга қарашли бўлиб, улар 30 миллиард евродан ортиқ йўқотган. Иккинчи ва учинчи ўринларни 40 миллиард евродан кўп зарар кўрган немис ва француз фирмалари эгаллади. Италия, Ирландия ва Дания компаниялари ҳам катта йўқотишларга учради.

Россиянинг Украинага кенг кўламли босқини ортидан кўплаб хорижий компаниялар Россия бозоридаги фаолиятини тўхтатди ёки мамлакатни тарк этди.

Киев Иқтисодиёт мактаби маълумотларига кўра, 260 дан ортиқ Ғарб компанияси Россия Федерациясини бутунлай тарк этган, 700 дан ортиғи ўз фаолиятини тўхтатган, 1 400 га яқини эса аввалгидек ишлашда давом этмоқда.