АҚШ президенти Дональд Трамп 8 май ва 11 ноябрни Биринчи ва Иккинчи жаҳон урушларидаги Ғалаба кунлари сифатида нишонланишини эълон қилди. Бу ҳақда у ўзининг Truth Social ижтимоий тармоғидаги саҳифасида маълум қилди.
Трамп АҚШнинг Иккинчи жаҳон урушидаги ғалабага қўшган ҳиссасини энг катта деб баҳолаган. Америка раҳбарининг фикрича, Вашингтон Биринчи жаҳон урушида ҳам ғолиб чиққан. Шу муносабат билан Трамп бу воқеаларни нишонлашга даъват этиб, давлат байрамлари сифатида жорий этилишини билдирган.
“Кўпгина иттифоқчиларимиз ва дўстларимиз 8 майни Ғалаба куни сифатида нишонлайди. Бироқ айнан биз Иккинчи жаҳон урушидаги ғалабага бошқа ҳар қандай мамлакатга қараганда беқиёс даражада кўпроқ ҳисса қўшганмиз. Бугун мен 8 майни Иккинчи жаҳон урушидаги Ғалаба куни, 11 ноябрни эса Биринчи жаҳон урушидаги Ғалаба куни деб эълон қиламан. Биз иккала урушда ҳам ғалаба қозондик, куч-қудрат, жасорат ёки ҳарбий маҳоратда ҳеч ким бизга тенг кела олмади, лекин биз ҳеч қачон ҳеч нарсани нишонламаймиз — чунки буни қандай қилишни биладиган раҳбарларимиз энди йўқ! Биз яна ғалабаларимизни нишонлашни бошлаймиз!”, дея ёзган АҚШ президенти.
Трамп ўзининг 2017 йилдаги баёнотларидан бирида Биринчи ва Иккинчи жаҳон урушларидаги ғалабани АҚШга тегишли деб эълон қилган эди.
Изоҳ (0)