Кремль ва Оқ уй вакиллари келаси ҳафта Саудия Арабистонида учрашишлари кутилмоқда. Бу ҳақда Bloomberg тегишли манбаларга таяниб хабар берди.
Уларнинг айтишича, Россия ва АҚШ амалдорлари Владимир Путин ва Дональд Трамп ўртасидаги эҳтимолий музокаралар учун “замин тайёрлайдилар”. Бу музокараларда Украинадаги урушни тўхтатиш масаласи муҳокама этилиши режалаштирилмоқда.
Bloomberg маълумотларига кўра, учрашув тафсилотлари ва иштирокчилар рўйхати ҳали ишлаб чиқилмоқда. Тахминларга кўра, АҚШ томонидан миллий хавфсизлик бўйича маслаҳатчи Майкл Уолц ва махсус вакил Стив Виткофф, Россия томонидан эса ташқи сиёсат бўйича маслаҳатчи Юрий Ушаков, Ташқи разведка хизмати директори Сергей Наришкин ва Россия тўғридан тўғри инвестициялар жамғармаси раҳбари Кирилл Дмитриев иштирок этиши кутилмоқда.
Агентликнинг таъкидлашича, Украина ва аксарият Европа мамлакатларининг ҳукуматлари Россия ва АҚШ амалдорларининг учрашуви ҳақида хабардор қилинмаган. Шу билан бирга, Саудия Арабистони раҳбарияти музокараларга АҚШ, Россия ва Украина вакилларини таклиф этган.
Кимдир Саудия Арабистонида АҚШ ва Россия президентлари даражасидаги учрашув бўлишини айтганини эшитдим. Қандайдир тинчлик музокаралари эмиш. Ҳатто байроғимизни ҳам қўйишибди. Бу нима эканлигини билмайман, деди Украина президенти Владимир Зеленский журналистлар билан суҳбатда.
Bloomberg манбалари таъкидлашича, Путин ва Трампнинг Саудия Арабистонидаги учрашувлари февраль ойи охирида бўлиб ўтиши мумкин.
Аввалроқ Financial Times нашри Трамп ва Путин 20 апрелга тўғри келадиган Пасха байрами ёки 9 майга қадар Украинадаги урушни тўхтатиш бўйича келишувга эришиши мумкинлиги ҳақида ёзган эди.
“Путин шундай муҳим кунлардан бирида келишувга эришишни хоҳлайди”, дейди украиналик амалдор.
Путинга яқин манбаларга кўра, президентнинг асосий мақсади Россияга Европадаги таъсир доирасига ўхшаш мавқени таъминлайдиган янги хавфсизлик тизимини яратишдир. Бу худди Иккинчи жаҳон уруши охирида Ялта конференцияси Совет иттифоқига берган имкониятларга ўхшаш бўлиши кутилмоқда.
Ҳозирги вазият Путин учун уч йиллик урушнинг бошқа ҳар қандай давридагидан ҳам қулай кўринмоқда, деб таъкидлайди Берлиндаги Карнеги Евроосиё маркази директори Александр Габуев.
У АҚШ Украинани ҳарбий ва дипломатик жиҳатдан қўллаб-қувватлашни, разведка маълумотлари алмашишни тўхтаца, Киев жуда оғир аҳволга тушиши таъкидлади.
Бу Европа давлатлари янада кўпроқ аралашса ҳам, инқироздан чиқишни кафолатламайди, деди у.
Таъкидланишича, Трампнинг 12 февраль куни россиялик ҳамкасбига телефон қўнғироғи Москвада сезиларли кайфият уйғотган.
Изоҳ (0)