Барча материаллар нафақат Аргентинага қочиб кетган нацистлар фаолиятини, балки 1976—1983 йиллардаги Аргентина диктатураси давридаги ҳарбий ҳаракатларни ҳам қамраб олган алоҳида ҳужжатлар тўпламига жамланган. Ҳужжатларни махфийликдан чиқаришни Аргентинанинг амалдаги президенти Хавьер Милей буюрган эди.
Иккинчи жаҳон урушидан кейин Аргентина ва Жанубий Американинг бошқа мамлакатларига 10 мингга яқин нацист қочиб кетган. Тергов маълумотларига кўра, Ватиканнинг вакиллари уларга сохта ҳужжатларни расмийлаштириш орқали ёрдам берган.
Маълум бўлишича, урушдан кейин Жанубий Америкада Освенсим конслагери маҳбуслари устидан тиббий тажрибалар ўтказган нацист Йозеф Менгеле яширинган.
Шунингдек, архивларда Исроил разведкаси операцияси натижасида Аргентинадан олиб чиқиб кетилган ва қатл этилган “Холокост меъмори” Адолф Эйхман, СС офицерлари Эрих Прибка ва Клаус Барби (“Лион қассоби”), Хорватия миллатчилик ҳаракатининг етакчиси Устача Анте Павелич ҳақида сўз боради. Бундан ташқари, Жанубий Америкада Қаршилик ҳаракати аъзоларини ўлдириш ва бошқа жиноятлар учун жавобгар бўлган Клаус Барби яширинган.
Аргентина ҳукумати гестапочи Эрих Прибка ҳақидаги маълумотларни ҳам эълон қилди. У 1944 йилда Римдаги оммавий қатллар учун жавобгар бўлган. Архивда Аргентинага қочиб кетган ва исмини Педро Рикардо Ольмога ўзгартирган гестапо ходими Валтер Кучманга оид ҳужжатлар мавжуд. Уни 1975 йилда топишга муваффақ бўлишган, аммо ўшанда у қамоққа олиниш ва экстрадициядан қутулган. 1986 йилда эса Интерпол агентлари томонидан қамоққа олинганидан сўнг Буэнос Айресдаги шифохонада юрак хуружидан вафот этган.
Архивларда тилга олинган шахсларнинг айримлари Аргентинада узоқ йиллар яшаб, ўша ерда вафот этган, бошқалари, масалан, Прибке, уруш пайтидаги жиноятлари учун экстрадиция қилиниб, судланган. Шунингдек, айримлари Аргентинадан бошқа мамлакатларга қочиб кетган.
Нацистлар режимининг энг номдор шахслари — Освенсим асирлари устида тажриба ўтказган доктор Йозеф Менгеле ҳамда Холокост ташкилотчиси, яҳудийларни ўлим лагерига юбориш операциясини бошқарган Адолф Эйхман ҳам айнан Аргентинадан бошпана топганди. Ньюренберг жараёнидан кейин Исроил ҳукумати томонидан қидирувга берилган шахслар орасида улар мос равишда иккинчи ва биринчи ўринни эгалларди.
Изоҳ (0)