Украинага қарши Россия армияси сафида жанг қилган шимолий кореяликларнинг 600 га яқини ҳалок бўлган. Бу ҳақда Reuters хабар берди.
Жанубий Корея разведкасига кўра, ярадорларни ҳисобга олган ҳолда КХДРнинг умумий йўқотишлари 4700 кишидан ошади. Қурбонлар Курск вилоятида кремация қилинган. Айнан шу ҳудудга Шимолий Корея ҳарбий кучлари юборилган эди.
Россия томонида урушда иштирок этган Шимолий Корея ҳарбийларининг жанговар салоҳияти анча ошган. Улар дронлар каби янги турдаги қуроллардан фойдаланишни ўрганган. КХДР урушга тахминан 15 минг нафар ҳарбийни юборган бўлиши мумкин.
Улар Шимолий Корея раҳбари Ким Чен Иннинг шахсий буйруғи билан Курскка жўнатилган. Бу 2024 йил июнь ойида Россия билан имзоланган стратегик ҳамкорлик тўғрисидаги икки томонлама шартнома асосида амалга оширилган. Россия президенти Владимир Путин ҳарбийларни юборгани учун Ким Чен Инга миннатдорлик билдирган.
КХДР раҳбари эса ҳарбийларни “қаҳрамонлар” деб атаган, уларнинг Россия ҳудудини озод қилиш операциясидаги иштирокини “муқаддас миссия” деб баҳолаган. Шунингдек, Пхеньянда ҳарбийлар шарафига ёдгорлик ўрнатилишини маълум қилган.
Январь ойида Украина армияси Курск вилоятида шимолий кореялик икки аскарни асирга олганди. Президент Владимир Зеленский 12 январь куни улар сўроққа тутилгани акс этган видеони эълон қилган. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлаган.
Изоҳ (0)