Шимолий Кореядан қочиб кетган аёл ёпиқ мамлакат мактабларидаги ҳаёт қандайлигини ошкор қилди. Таълим муассасасида болалар оғир меҳнат қилишга, калтакланишга ва КХДР етакчиси Ким Чен Иннга сиғинишга мажбурланиши айтилмоқда. Бу ҳақда Mirror нашри хабар берди.
Белла Сео ҳозирда 23 ёшда ва Жанубий Кореянинг Сеул шаҳрида истиқомат қилади. У КХДР мактабларида болаларнинг баҳолари учун энг муҳим фан Кимлар оиласини ўрганиш эканини таъкидлади. Мазкур фан учун кунига учта дарс ажратилади, умумий кунлик дарслар сони эса одатда еттита.
Ким оиласининг “Болалик тарихи ва инқилобий тарихи” энг муҳим фанлар ҳисобланади. Ўқувчи корейс тили, инглиз тили, математика, тарих, табиий фанлар, жисмоний тарбия ёки санъат фанларини аъло даражада билса ҳам, унинг умумий баҳоси ушбу мафкуравий фанлардан ўзлаштиришига боғлиқ, дейди кореялик қочқин.
Ҳар бир ўқув куни Ким сулоласи портретларининг чангини тозалаш ва садоқат қўшиқларини куйлаш маросими билан бошланади. Шанба кунлари эса қўшимча ўз-ўзини танқид қилиш сессияси бўлиб ўтади. Унда ўқувчилар ўзининг ғоявий камчиликларини таҳлил қилади.
Бироқ таълим дастури мактабдаги энг оғир қисм эмас эди, деди аёл.
У дарслар тугаб, ўқувчилар уйга кетишдан олдин яна уч-тўрт соат давомида оғир жисмоний меҳнат билан шуғулланишга мажбур бўлишини айтди. Белла Сео ўқиган мактабда ўқувчиларга мактабнинг тошлоқ ҳовлисини қум билан текислаш вазифаси юклатилган. Бу узоқ муддатли вазифа бўлиб, кўп меҳнатни талаб қилган.
Бу кўпинча ҳар куни мактабдан кейин уч-тўрт соат давом этарди. Қум ва тошлар билан тўлдирилган 25 килограммлик қопларни кўтариб юришимга тўғри келарди, бу жуда қийин эди, деб эслайди у.
Аёлнинг сўзларига кўра, бундай дарс кунидан кейин у кўпинча овқатланишга ҳам қувват тополмасди, шу сабабли уйга қайтгач, дарҳол ухлашга ётарди. Белла Сео ушбу лойиҳа учун молиявий харажатлар ҳам ўқувчилар оиласининг бюджетига тушганини таъкидлади.
Қиш фаслида ўқувчилар дарслар бошланишидан олдин қор кураган. Қор ёғиши натижасида ўқув жараёни одатда иккинчи ёки ҳатто учинчи дарсдан сўнг бошланган. Шимолий Корея тарғиботи мамлакатда мактаб таълими бепул экани билан мақтанади. Аммо аёлнинг сўзларига кўра, ота-оналар зиммасига тушадиган кўплаб мажбурий харажатлар мавжуд.
Ўқувчилар мактаб тадбирларининг харажатларини ўз ҳисобларидан қоплаши лозим эди — ҳатто ўқитувчиларнинг туғилган кунлари, тўйлар ва оилавий байрамлар ҳам маблағ йиғишни талаб қиларди. Синф раҳбарлари ҳаммадан кўпроқ пул ажратарди. Бу кунлик иш ҳақи билан кун кечирадиган оилалар учун оғир юк эди. Тўловни амалга оширолмаган ўқувчилар, кўпинча синфдошларидан ижтимоий изоляция ёки ўқитувчиларнинг жисмоний жазолари билан юзлашарди, бу ўқитувчининг кайфияти ва шахсиятига қараб фарқ қиларди, дейди Белла Сео.
Таъкидланишича, КХДР мактаб тизими учун болаларга нисбатан жисмоний зўравонлик оддий ҳол ҳисобланади. Масалан, Белла Сеонинг дугоналаридан бирини синф раҳбари дарсдан кейин хонани тозалаш пайтида ҳаддан ташқари шовқин қилгани учун урган.
Муаллима унинг сочидан ушлаб, бир урди ва ўқитувчи столига улоқтирди. У йиғлаб, кечирим сўради. Кейинчалик унинг ота-онаси мактабга ташриф буюриб, ўқитувчидан узр сўради, бироқ ҳодиса жиддий муаммо сифатида кўрилмаган. Бу мактабда кўп учрайдиган зўравонликлардан бири эди, холос, деди шимолий кореялик аёл.
У дарсларда АҚШ “доимий душман”, улар билан бирга яшаш имконсиз деб таърифланганини айтди. Шу билан бирга, Жанубий Корея “қашшоқ ва оч қолган” мамлакат сифатида тасвирлангани маълум қилинди.
Изоҳ (0)