АҚШ Тинч океани минтақаси қўмондони адмирал Самуэл Папаро Сенат Қуролли кучлар қўмитасига баёнот бериб, Шимолий Кореянинг Россияга ҳарбий ёрдамини жиддий хавф сифатида баҳолади. Унга кўра, Пхеньян рус армиясига юзлаб қисқа масофали баллистик ракеталар ва юз минглаб артиллерия снарядларини юборган.
Папаро бу ҳаракатни “икки давлат заиф томонларини ўзаро биргаликда тўлдираётган трансаксион симбиоз” деб атади. Унинг айтишича, Москва бунга жавобан иттифоқчисига замонавий ҳаво мудофаа тизимлари, жумладан, ер-ҳаво ракета тизимларини етказиб бермоқда.
Таҳлилчиларга кўра, қўмондоннинг Сенатдаги чиқиши Вашингтон Пхеньян ва Москва ўртасидаги ҳарбий ҳамкорлик алоқаларининг чуқурлашиб бораётганидан жиддий хавотирда эканини кўрсатади.
Жанубий Корея нашрларининг хабар беришича, Пхеньян 2024 йилнинг март ойи охиригача Россияга қурол-яроғларнинг навбатдаги патиясини юборган. Жўнатма таркибида 122 мм ва 152 мм калибрли артиллерия снарядларидан ташқари КН-23 қисқа масофали баллистик ракеталари ҳам бўлгани тахмин қилинмоқда.
Буюк Британияда жойлашган Cонфлиcт Армамент Research ташкилоти 2024 йилнинг июль ва август ойларида Украинада шаҳарларига учирилган ракеталар қолдиқларининг ўрганиб, уларнинг тўрттаси Шимолий Кореяда ишлаб чиқарилганини аниқлади. Эътиборлиси, улар ўша йилнинг ўзида ишлаб чиқарилган ракеталар бўлиб чиққан.
Бу Шимолий Корея ракеталари ишлаб чиқарилганидан атиги бир неча ой ўтиб Украинада ишлатилганини кўрсатадиган биринчи очиқ далилдир. Яъни, бу йиллар эмас, балки ойлар масаласи”, деган ташкилот раҳбари Лефф БМТ Хавфсизлик Кенгашида чиқиш қилиб.
АҚШ разведка хизмати ва мулозимлари Шимолий Корея Россияга қурол-яроғ етказиб бераётгани ҳақидаги хабарларни аввал ҳам бир неча бор тасдиқлаган эди. Аммо адмирал Папаронинг сўзлари бу борадаги энг жиддий баёнотлардан бири сифатида баҳоланмоқда.
Мутахассислар фикрича, Пхеньян ва Москва ўртасидаги ўзаро алмашинув Шимолий Корея учун стратегик имконият бўлиши мумкин. Расмийлар Пхеньяннинг ҳарбий технологик салоҳияти кучайишидан хавотирда.
Изоҳ (0)