Корея Республикаси армияси Шимолий Корея томонидан бўлиши мумкин бўлган провокацияларга тайёргарликни ошириш мақсадида денгиз чегараси яқинида ўқ отиш бўйича кенг кўламли тунги ҳарбий машғулотлар ўтказди. Бу ҳақда Yonhap агентлиги маълум қилмоқда.
Агентликнинг маълум қилишича, машқларда 40 га яқин асосий техника воситалари, жумладан, К9А1 ўзиюрар гаубитса, Chunmoo реактив ўт очиш қуроли ҳамда контрбатарея радари ва учувчисиз учиш аппарати каби кузатув воситаларидан фойдаланилган.
Машқлар Сеулдан тахминан 160 км шимоли-шарқда жойлашган қирғоқбўйи Косон туманида ўтказилган. Унда жами 300 нафарга яқин ҳарбий хизматчи қатнашган.
“Машқлар давомида қўшинлар радар ёрдамида шартли рақибнинг таҳдидини аниқлади ва унга жавобан ўт очди. Сўнгра улар дронлар ёрдамида натижани тасдиқлаб, яна ўт очишди ва шу тариқа яшин тезлигидаги ўт очиш қудратини намойиш этишди”, дейилади хабарда.
Таъкидланишича, машғулотлар бошланишидан олдин маҳаллий аҳоли қирғоқ қўриқчилари билан ҳамкорликда хавфсизлик қоидалари билан таништирилган.
8 апрель куни Жанубий Корея икки давлат чегарасидан ўтувчи демаркация чизиғини кесиб ўтган Шимолий Корея аскарлари гуруҳига огоҳлантирувчи ўт очганди.
17-21 март кунлари Жанубий Корея ва АҚШ Шимолий Кореянинг ерости туннеллари ва асосий ерости иншоотларини эгаллашга қаратилган қўшма ҳарбий машғулотларни бошлади.
Изоҳ (0)