АҚШ президенти Дональд Трамп Шимолий Кореяни тўлиқ ядросизлантиришга чақирди. Пхеньян буни амалга ошмайдиган ҳаракат сифатида баҳолади. Бу ҳақда Arms Control Association хабар берди.
15 февралда Япония, Жанубий Корея ва АҚШ Шимолий Кореяни “тўлиқ ядросизлантиришга қатъий содиқлик” тўғрисида битим имзолаган эди. Келишувда учала давлат ҳам ўзларига қилинадиган ҳар қандай провокация ва таҳдидларга тоқат қилолмасликларини тасдиқлаган.
Баёнот Мюнхенда АҚШ давлат котиби Марко Рубио, Япония ташқи ишлар вазири Ивая Такеши ва Жанубий Корея ташқи ишлар вазири Чо Теюл билан учрашувдан сўнг эълон қилинган.
Шимолий Корея юқоридаги уч давлатни “Корея яриморолида коллектив қарама-қаршилик ва можаро келтириб чиқаришда” айблади ва ядросизланиш мақсади “эскирган ва бемаъни” эканини билдирди. Баёнотда Шимолий Корея ўзининг ядровий қуролларини “тинчлик ва суверенитетни ҳимоя қилиш воситаси” деб атади.
АҚШ мудофаа вазири Пит Хегсет ядросизланиш Трамп сиёсатининг бир қисми бўлишига шубҳа билан қараган эди. Кейинчалик у январь ойида билдирган бу норозилигининг сабаби Шимолий Кореянинг “ядровий давлат” мақоми эканини айтган. Жанубий Корея эса Шимолий Кореяни “ҳеч қачон ядро қуролига эга давлат” сифатида тан олмаслигини билдирган.
Трамп 2018 йилда Сингапурда Шимолий Корея етакчиси Ким Чен Ин билан учрашганида, икки давлат раҳбарлари “Корея яриморолини тўлиқ ядровий қуролсизлантириш”га чақирувчи қўшма декларацияни имзолаган эди. Бироқ ўша йили Шимолий Кореянинг ядровий доктринаси ўзгариб, мамлакат янги ҳарбий имкониятларга сармоя киритди. Ушбу имкониятлар орасида Америка қитъасини нишонга олишга қодир ядровий ракеталар ҳам мавжуд.
Шунингдек, Шимолий Корея келажакда ракета тизимларини ривожлантириш нияти борлигини ҳам қайд этган. Трамп ўз лавозимига қайтганидан бери у билан яна учрашишга тайёрлигини айтса-да, Шимолий Корея ҳозирда Қўшма Штатлар билан мулоқотни тиклашдан манфаатдор эмас.
Ким Чен Ин армияси ташкил этилганининг 77 йиллигига бағишланган нутқида минтақада хавфсизликни таъминлаш учун ядро қуролларини кўпайтириш кераклигини айтган. У “чексиз мудофаа” режаларини такрорлаб, Қўшма Штатларни минтақада ядровий стратегик активларни жойлаштириш орқали можаро хавфини оширишда айблаган.
Келажакда Шимолий Корея ва Жанубий Корея ўртасидаги муносабатларнинг ёмонлашуви АҚШнинг ҳар қандай дипломатик саъй-ҳаракатларини янада қийинлаштириши мумкин.
Изоҳ (0)