Жаҳон соғлиқни сақлаш ташкилоти жорий йил бошида аянчли статистикани эълон қилди. Сўнгги йилларда бутун дунё бўйлаб йигирма миллиондан ортиқ кишида саратон касаллиги қайд этилди. Ўлим кўрсаткичи эса 9,7 миллионни ташкил этди.
Саратон касаллигини ўрганиш халқаро агентлиги (IARC — International agency for research on cancer) 2030 йилга бориб касалланганлар сони 22,2 миллионни ташкил этишини тахмин қилмоқда. Касалликни енгишга бўлган ҳаракатлар доим ҳам муваффақиятли кечмайди. Аммо уни эрта аниқлаш тўлиқ даволанишнинг муҳим омилидир.
Бугунги қаҳрамонларимизга эса саратон касаллигидан халос бўлиш насиб этди.
Юлия Волкова
“t.А.Т.u” гуруҳининг собиқ аъзоси, хонанда Юлия Волкованинг иккинчи фарзанди туғилгач, 2012 йилда унга қалқонсимон без саратони ташхиси қўйилди. Актрисанинг сўзларига кўра, тушида у саратондан дарак берувчи воқеаларни кўрган.
“Мен қон таҳлилини ўтказдим, натижа яхши эди. Ултратовуш текшируви қалқонсимон безда тугунни аниқлади. Биопсия саратон касаллигига чалинганимни кўрсатди... Операция бўлдим, аммо у муваффақиятсиз ўтди. Овоз нерви кесилгач, овозимни буткул йўқотдим”, — деди хонанда.
Тўрт йилдан сўнг касаллик қайталанди. Юлия фарзандлари онасиз катта бўлишидан қўрқар эди. Хайрият, бу сафар касалликни енгди ва саратон ортда қолди.
Роберт Де Ниро
Голливуд актёри, “Чўқинтирган ота”, “Стажёр”, “Бир куни Америкада” ва бошқа кўплаб фильмлар юлдузи Роберт Де Нирога 2003 йилда простата бези саратони ташхиси қўйилди. Актёр мунтазам равишда йиллик текширувдан ўтиб турар эди. Шундай текширувларнинг бирида шифокорлар Робертда касалликни аниқлади.
“Оскар” ва BAFTA мукофотлари совриндори даволаниш учун “Беркин ва мени изла” фильмидаги суратга тушиш ишларини кечиктиришга мажбур бўлди. Унинг отасига ҳам бир вақтлар шундай ташхис қўйилган, аммо ота даволанишдан воз кечган.
Анжелина Жоли
Голливуд актрисаси саратонга чалиниш эҳтимолини аниқлаш учун BRCА-1 ген мутациясига тест топширди. Чунки ген аёлларда кўкрак ва тухумдон саратони эҳтимолини ошириши мумкин. Натижа мусбат чиққач, Жоли сут безлари ва тухумдонларни олиб ташлаш учун операциядан ўтишга қарор қилди:
“BRCА-1 тести ижобий натижа кўрсатиши автоматик равишда операция қилиш кераклигини англатмайди. Мен бир нечта шифокорлар, жарроҳлар ва натуропатлар билан суҳбатлашдим. Ҳар қандай соғлиққа оид муаммони ҳал қилишнинг бир неча йўли мавжуд, албатта. Энг муҳими, тўғри йўлни билиш ва танлашдир”.
Анжелинанинг онаси саратондан 56 ёшида, унинг холаси эса 61 ёшида вафот этган.
Кайли Миноуг
2005 йилда австралиялик хонанда Кайлида кўкрак бези саратони аниқланди. Даволаниш ва саломатликни тиклаш учун қўшиқчи фаолиятини тўхтатишга қарор қилди. Турли мамлакатлар бўйлаб гастрол сафарларини, янги мусиқа ёзишни ва журналистлар билан мулоқот қилишни тўхтатди.
36 ёшида онкологиянинг 1-босқичи тасдиқлангач, Миноуг чуқур депрессияга тушиб қолди: у ҳеч ким билан мулоқот қилмади, фаолиятини тўлиқ тугатиш ҳақида кўп ўйлади. Юлдузнинг сочлари тўкилиб, вазни 38 килограммга етган эди. Хонандани яқин инсонлари қўллаб-қувватлади ва у саратон устидан ғалаба қозонди.
Бўлиб ўтган воқеалардан кейин Миноуг аёлларни маммолог кўригидан ҳар йили ўтиб туришга даъват эта бошлади ва мамлакатда шифокорларга ташрифлар юз баробар кўпайди.
Хью Жекман
Росомаха образи билан танилган Хью Жекманда биринчи марта саратон бези 2013 йилнинг ноябрь ойида аниқланган. 2014 йил май ойида эса касаллик қайталанган. Аввалроқ Жекман матбуотга берган интервьюсида ракнинг бу тури касаллик бошланғич даврида аниқланса, осон даволаниши, фақатгина мунтазам шифокор кўригида бўлиш ҳамда қуёшдан сақловчи воситалардан фойдаланиш кифоя эканлигини таъкидлаган.
Актёр базал ҳужайрали карсинома — ўта хавфли тери саратони билан анча йиллардан бери курашиб келмоқда. Жорий йилнинг бошида эса Жекман баёнот берди: саратон яна қайталанди. Эндиликда Жекманни яна бир курс даволаниш ишлари кутмоқда.
Изоҳ (0)