Умр йўлдошининг ўлимидек оғир жудоликни бошдан кечирган Голливуд юлдузлари (фото)

Юлдузлар ҳам шон-шуҳрат, бойлик ва машҳурлигига қарамай, оддий одамлар каби шахсий фожиалардан ҳимояланишмаган. Бир кун ичида юз берган даҳшатли зарба уларнинг мукаммал кўринадиган ҳаётини бутунлай ўзгартириши мумкин.

Жон Траволта ва Келли Престон

Жон Траволтанинг шахсий ҳаёти бахтсизликларга тўла кечди. Актёрнинг биринчи муҳаббати Диана Хайланд кўкрак саратонидан вафот этади. Жон унинг ўлимини жуда қаттиқ қабул қилади. Келли Престон билан турмуш қурганда эса уни навбатдаги фожиа кутаётган эди. Улар бахтсиз ҳодиса туфайли вафот этган 16 ёшли ўғли Жеттни дафн этишади — ўғли эпилепсия туфайли ваннага бошини уриб олиши оқибатида дунёдан кўз юмади. Эр-хотин учун ўғлининг ўлими даҳшатли зарба бўлади, улар узоқ вақтгача оммага кўриниш бермайди. Аммо кейинчалик хушхабар билан қайтишади — Келли ҳомиладорлигини эълон қилади. Бироқ 2018 йилда Келлига кўкрак саратони ташхиси қўйилади, актриса икки йилдан кейин вафот этади.

Мишель Уильямс ва Хит Лежер

Бир қарашда Мишель Уильямс ва Хит Лежер ҳамма нарсага эга бўлган мукаммал жуфтликдек туюларди. Иккаласи ҳам ёш ва машҳур, севимли қизини биргаликда тарбиялашарди.

Лежер ва Уильямс 2005 йилда “Букри тоғ” фильмининг суратга олиш жараёнида танишган ва бир кўришдаёқ бир-бирини севиб қолишган. Суратга олиш жараёни тугаганидан кўп ўтмай, жуфтлик Бруклинда яшай бошлайди. Аммо 2006 йилга келиб ўртадаги муносабатлар ўзгаради — Лежер депрессияни енгиш учун тунги базмларда кўп вақт ўтказар, гиёҳвандликка берилиб кетганди.

Уильямс ва Лежер ажралишига сабаб бир-бирини севмай қолгани эмас, балки Уильямс Лежернинг қилиқларига чидай олмагани учунлиги айтилади. Хит ўз уйида жонсиз ҳолда топилганида Мишель ўта оғир тушкунликка тушади. Ўлим сабаби кучли дори воситалари дозасини ошириб юбориш натижасида келиб чиққан заҳарланиш эди.

Севгилиси вафотидан кейин Уильямс икки марта турмушга чиқади. Иккинчи турмушидан унинг икки фарзанди бор.

Мерил Стрип ва Жон Казале

Жон Казале Мерил Стрипнинг биринчи муҳаббати ҳисобланади. Улар танишганда Казале аллақачон жуда машҳур эди, Мерил эса эндигина шон-шуҳрат чўққисига чиқа бошлаганди. Казале Мерил билан бирга бўлиш учун хотини билан ажрашмоқчи эди. Аммо тақдир уларга синов ҳозирлаб қўйганди — актёрга саратон ташхиси қўйилади.

Казале ҳаётининг сўнгги ойларини Стрип билан касалхонада ўтказади. “Мен унинг ёнида бўлсам-да, ўлими яқинлашиб қолганини сезмадим. У ҳаётдан кўз юмганда ўзимни йўқотиб қўйдим”, — дейди Стрип. Оғир зарбага қарамай, Мерил яшаш учун куч топади. Севгилиси вафотидан олти ой ўтгач, Дон Гаммер билан танишади. Ҳозирда у билан 44 йилдан бери бахтли яшаб келмоқда.

Элизабет Тейлор ва Майкл Тодд

Майкл Тодд Элизабет Тейлорнинг ажрашишга улгурмаган ягона эри бўлган. Актриса 24 ёшида продюсерга турмушга чиқади. Турмуш ўртоғи ундан 23 ёш катта эди, бу турли миш-мишларга сабаб бўлади. Жамоатчилик танқидига қарамай, жуфтлик чинакамига бахтли эди. Баъзилар ҳатто Элизабет ҳеч қачон бунчалик  порлаб турмаганлигини айтишади. Бироқ бир неча ой ўтгач, Майкл Тодд самолёт ҳалокатида вафот этади. Айрилиқ қанчалик оғир бўлишга қарамай Тейлор эрини дафн этгач, кўп ўтмай оилавий дўсти Эдди Фишерга турмушга чиқади.

Лиам Нисон ва Наташа Ричардсон

Наташа Ричардсон Лиам Нисоннинг биринчи ва ягона рафиқаси бўлиб қолди. 2009 йилда у ўғли билан Канададаги чанғи курортида дам олаётган эди. Наташа чанғи учаётиб йиқилиб тушса-да, тиббий ёрдамдан бош тортади — жароҳатини енгил деб ўйлайди. Афсуски, жароҳат у ўйлагандан ҳам хавфлироқ бўлиб чиқади. Ричардсон касалхонага борганида кеч бўлганди. Бошдан олинган жароҳатларда вақт муҳим аҳамиятга эга ҳисобланади.

Фожиадан икки кун ўтгач, Нисон хотинини аппаратдан узиб қўяди. У ва рафиқаси агар улардан бири вегетатив ҳолатда бўлса, қурилмадан узиб қўйишлари ҳақида келишиб олишганди. Орадан йиллар ўтган бўлса-да, актёр Наташанинг йўқлигига ҳали ҳам ишонолмаслигини айтади. Рафиқаси вафотидан кейин Нисон қайта турмуш қурмади. Бундан ташқари, сўнгги 14 йил ичида унинг биронта ҳам севгилиси бўлмаган.

Патрик Суэйзи ва Лиза Ниеми

​Патрик Суэйзи 16 ёшли Лиза Ниемини биринчи марта кўрганида 20 ёшда эди. Актёрнинг айтишича, уни биринчи кўргандаёқ севиб қолган. Эр-хотин 34 йил давомида — актёрнинг вафотигача бирга бўлишади. Суэйзи 2009 йилда ошқозон ости бези саратонидан вафот этади. Эрининг ўлимидан сўнг, Лиза Алберт Деприско билан танишади. Деприско уни қўлини сўрайди, тўйга бир ой қолганда Ниеми марҳум эрини тушида кўради. Шу йўл билан эри унга розилигини бериб, яшашда давом этишга руҳлантирганини айтади.

Пирс Броснан ва Кассандра Харрис

Жеймс Бонд фильми актёри Пирс Броснан ва унинг экрандаги севгилиси Кассандра Харрис ҳақиқий ҳаётда ҳам яқин эди. Жуфтлик 1980 йилда турмуш қуради, актёр рафиқасининг икки фарзандини ўзиникидек тарбиялайди, кейинчалик ўзлари ҳам фарзандли бўлишади. Бироқ Харрисга тухумдон саратони ташхиси қўйилади. Броснан саккизта операция, кимётерапия ва холистик терапия пайтида рафиқаси билан бирга бўлади, лекин унга ҳеч нарса ёрдам бермайди. Кассандра 1991 йилда 43 ёшида дунёдан кўз юмади. Онасининг тақдири қизида ҳам такрорланади, у ҳам 41 ёшида тухумдон саратонидан вафот этади. Хотинининг ўлимидан 10 йил ўтгачгина Броснан қайта турмуш қуради.