Халқаро жиноят суди Венгриянинг ҳибсга олиш ордери чиқарилган Исроил бош вазири Биньямин Нетаньяхунинг мамлакатга ташрифи муносабати билан суд билан ҳамкорлик қилиши шартлигини маълум қилди.
Нетаньяхунинг ташрифига келсак, суд ҳибсга олиш ордери чиқарилганидан сўнг ўзининг стандарт тартиб-қоидаларига амал қилди. Суд Венгриянинг ХЖС билан ҳамкорлик қилиш мажбурияти сақланиб қолаётганини эслатади, дейди суд матбуот хизмати журналистларга берган баёнотида.
2 апрель куни Нетаньяху расмий ташриф билан Венгрияга келди. Times of Israel нашрининг ёзишича, бу Нетаньяхунинг 2024 йил ноябрь ойида Халқаро жиноят суди уни ҳибсга олиш ордерини чиқарганидан бери Европага илк сафари ҳисобланади.
ХЖС Биньямин Нетаньяху ва Исроилнинг собиқ мудофаа вазири Йоав Галантни Ғазо секторидаги эҳтимолий ҳарбий жиноятлари учун ҳибсга олиш ордерини чиқарган. Суд, шунингдек, ўз фуқароларига нисбатан ордер чиқариш бўйича суд юрисдикциясига эътироз билдиришга уринган Исроилнинг далилларини рад этган. Бундан ташқари, Исроил ХЖСнинг умуман Фаластиндаги вазият бўйича ишларни кўриб чиқиш юрисдикциясига ҳам эътироз билдирган эди.
Венгрия бош вазири Виктор Орбан 2024 йил ноябрь ойида Нетаньяхуни мамлакатга таклиф қилиш ва Халқаро жиноят суди қарори унинг ҳудудида амалга оширилмаслигини кафолатлаш ниятида эканини айтганди.
Венгрия бош вазири маъмурияти раҳбари Гергей Гуйяш Венгрия ХЖС низомини ратификация қилмаганини, шу сабабли Исроил бош вазири ордер бўйича ҳибсга олинишдан чўчимасдан бемалол мамлакатга келиши мумкинлигини таъкидлади.
Венгрия ҳукумати ХЖСдан чиқиш тўғрисида қарор қабул қилгани маълум қилинганди.
Изоҳ (0)