Исроил ҳукумати Фаластин ҳудудидан қўшинларни олиб чиқмасдан ҲАМАСни гаровга олинганларни қўйиб юборишга мажбурлаш учун “жаҳаннам режаси”ни тайёрламоқда. Бу ҳақда The Guardian хабар берди.
Мазкур режа доирасида Ғазодаги қамални янада кучайтириш режалаштирилган. Ҳозирча олти ҳафталик вақтинчалик тинчлик келишуви кучда қолаётган бўлса-да, унинг кейинги босқичи ҳақида музокаралар олиб борилмаяпти. Шу сабабли, Исроил ва ҲАМАС яна урушга қайтиш эҳтимолига тайёргарлик кўрмоқда.
Исроил Ғазога озиқ овқат ва ёнилғи ортилган гуманитар ёрдамни тўхтатишдан ташқари секторнинг 2,2 миллион аҳолисини аста-секин тўлиқ изоляция қилишга тайёргарлик кўрмоқда. Ҳукумат бу чоралар дастурини “жаҳаннам режаси” деб атаётгани айтилмоқда.
Walla янгиликлар сайти хабар қилишича, мудофаа вазири Исроил Кац мамлакар мудофаа кучларига жанговар ҳаракатларга қайтиш учун тайёргарлик кўришни буюрган. 5 мартдан кунидан бошлаб улар янги штаб бошлиғи генерал майор Эял Замир қўл остида хизмат қилади. Замир Ғазода қолган ҲАМАС жангчилари устидан тез ва ҳал қилувчи ғалабага эришиш учун кучли ҳужум тарафдори ҳисобланади.
ҲАМАС ҳам тайёргарлик кўрмоқда
Араб нашрларига кўра, ҲАМАС ҳам жангларни қайта бошлашга тайёрланмоқда. Гаровга олинган исроилликларга нисбатан кучайтирилган хавфсизлик чоралари кўрилаётгани айтилмоқда.
Таъкидланишича, ҲАМАС уруш пайтида портламаган Исроил қуролларидан юқори портловчи моддаларни ажратиб олган ва жанглар қайта бошланса, улардан фойдаланиши мумкин.
Ўт очишни тўхтатиш бўйича музокаралар 28 февраль кунидан бери тўхтаб қолган. Исроил ҳукумати Рамазон ойи ва ундан кейин Пасха байрамида ўт очишни тўхтатишнинг биринчи босқичини 20 апрелгача узайтириш таклифини қатъий талаб қилмоқда. Бу даврда гаровга олинганларнинг ярми Исроил қамоқхоналаридаги фаластинликлар эвазига озод этилиши керак. Қолган ярми эса урушни бутунлай тўхтатиш тўғрисида келишувга эришилгандан сўнг озод қилинади.
Ғазодан ҳали қайтмаган 59 нафар исроиллик гаровга олинган шахслар бор, Исроил расмийлари уларнинг камида 34 нафари аллақачон ҳалок бўлган деб ҳисоблайди
Нетаньяху юқоридаги таклифни АҚШ махсус вакили Стив Витковга топширган, бироқ Витков ҳозирча бу ҳақда ҳеч қандай изоҳ бермаган.
ҲАМАС ушбу таклифни рад этиб, бу январь ойида ўт очишни тўхтатиш тўғрисидаги дастлабки келишувни бузиш эканини айтди. Унда ўт очишни тўхтатиш жорий ҳафтада иккинчи босқичга ўтиши назарда тутилган. Мазкур босқичда гаровга олинганларни озод қилиш Исроил қўшинларининг Ғазодаги стратегик нуқталардан, Ғазо ва Миср ўртасидаги буфер чизиқ бўлган Филаделфия йўлагидан бошлаб олиб чиқилиши билан боғлиқ.
Ўт очишни тўхтатишнинг биринчи босқичи давомидаги олти ҳафта мобайнида Ғазога кунига 600 га яқин юк машинаси, асосан озиқ-овқат ва ёқилғи билан, кириб борди. Бу урушдан олдинги ўртача кўрсаткичга тўғри келади. Исроил ҳукумати ҳудудда аллақачон асосий эҳтиёжлар учун катта захиралар мавжудлигини таъкидламоқда.
Ғазода озиқ-овқат ва таъминот етарли – ўт очишни тўхтатиш даврида ҳафтасига 4200 та юк машинаси кириб борди, бу кўп ойларга етади, деди ҳукумат вакили Девид Менсер.
У ҲАМАСда “семизлик эпидемиясини келтириб чиқарадиган даражада озиқ-овқат борлигини” айтиб, “таъминот мавжуд, лекин ҲАМАС уни тақсимламаяпти” дея даъво қилди. Исроил бош вазири ҲАМАС ҳаракатини “қабул қилиб бўлмас шартлар қўйиш” ва “инсонпарварлик юкларини ўғирлаш”да айблаган. Фаластин ҳаракати мазкур айбловларни рад этиб, буни “шантаж” деб атаган.
Изоҳ (0)