Исроил армияси 21 март куни Ғазо марказидаги “Турк-Фаластин дўстлиги” шифохонасини портлатиб юборди. У 2023 йил октябридан бери ҳаво ҳужумлари натижасида бир неча бор жиддий зарар кўрганди. Энди эса бутунлай вайрон қилинди. Бу ҳақда Al Jazeera хабар бермоқда.
Мазкур воқеа Исроил “Нетзарим йўлаги” деб аталадиган ҳудудда ҳарбий ҳаракатларни кенгайтириши ва Салаҳ ал-Дин кўчасини тўлиқ тўсиб қўйиши ортидан содир бўлди. Боиси касалхона уларга яқин жойлашган. Ғазолик журналист Тареқ Абу Аззоумнинг айтишича, бу саратонга чалинган минглаб беморларни даволаниш имкониятидан маҳрум қилган.
Ёқилғи захиралари йўқлиги сабаб 2023 йил 1 ноябрда ёпилган муасаса аввал ҳам бир неча бор нишонга олинган эди. БМТнинг огоҳлантиришича, унинг бутунлай вайрон этилиши 70 нафар беморнинг ҳаётини хавф остида қолдириб, кейинчалик улардан тўрт нафарининг вафот этишига олиб келган. Қайд этилишича, бунга тиббий ёрдам йўқлиги сабаб бўлган.
Журналист Абу Аззоумнинг сўзларига кўра, Исроил кучлари аввалги жанговар амалиётлар вақтида ушбу шифохонадан қўмондонлик маркази сифатида фойдаланган. У 2017 йили Туркиянинг 34 миллион долларлик ёрдами билан қайта қурилган ва жиҳозланган эди.
Исроил армияси муассасани тўлиқ йўқ қилганини тасдиқлади, бироқ у ерда ҲАМАС аъзолари фаолият юритганини исботловчи ҳеч қандай далил келтирмади.
Туркия Ташқи ишлар вазирлиги Исроил томонини қоралаб, бу “Ғазони яшашга яроқсиз қилиш ва фаластинликларни мажбуран кўчиришга қаратилган сиёсатнинг бир қисми” эканини айтди.
Халқаро ҳамжамиятни Исроилнинг ноқонуний ҳужумлари ва тизимли давлат террорига қарши аниқ ва огоҳлантирувчи чоралар кўришга чақирамиз, дейилади вазирлик баёнотида.
“Турк-Фаластин дўстлиги” шифохонаси Ғазодаги энг йирик онкология маркази ҳисобланиб, ҳар йили 30 минг нафаргача саратонга чалинган беморларга тиббий муолажа кўрсатиш имконига эга эди.
Изоҳ (0)