Индонезия президенти Прабово Субианто Ғазо секторида давом этаётган урушдан жабрланган фаластинликларга вақтинча бошпана беришга тайёр эканини айтди. Бу ҳақда Reuters хабар берди.
Прабовонинг сўзларига кўра, биринчи босқичда мингга яқин фаластинлик Индонезияга эвакуация қилиниши мумкин. Президент ташқи ишлар вазирига ушбу масалада Фаластин томони ва бошқа тегишли томонлар билан музокараларни тезлаштиришни топширган.
Биз жароҳатланганлар, руҳий зарба олганлар ва етим қолган болаларни эвакуация қилишга тайёрмиз. Улар Индонезияда вақтинча бўлади — тўлиқ соғайиб кетгунча ёки Ғазода хавфсизлик таъминланмагунча, деди Индонезия президенти.
Прабовонинг бу баёноти АҚШ президенти Дональд Трамп томонидан илгари сурилган фаластинликларни Ғазодан доимий кўчириш таклифига жавобан янгради. Индонезия бу таклифни қатъиян рад этган эди.
Трамп Ғазо аҳолисини кўчиришни ва “кўплаб давлатлар” уларни қабул қилишга тайёрлигини айтганди. Исроил бош вазири Биньямин Нетаньяху унинг таклифини қўллаб-қувватлаган.
Бошқа исталган жанговар ҳаракатлар бўлаётган ҳудудлардан, жумладан, Украина, Сурия ёки бошқа исталган жойдан одамлар кетиши мумкин эди. Ғазо эса одамлар қамалган ягона жой. Биз уларни қамаб қўймаганмиз. Одамларга танлаш имкониятини беришнинг нимаси ёмон?, деган Трамп.
Исроил бош вазири сўзларига кўра, улар Трамп билан Ғазо секторидан фаластинликлар кетиши мумкин бўлган мамлакатларни муҳокама қилган. Нетаньяху бу давлатлар агар фаластинликлар кетишни истаса, уларни қабул қилиши мумкинлигини айтмоқда. Исроил ҳудудни тиклаш учун йиллар кераклигини, шунинг учун унинг аҳолиси муқобил вариантга эга бўлиши муҳимлигини билдирган эди.
Маълумотларга кўра, Индонезия Ғазога инсонпарварлик ёрдами юборган ва икки давлат ечими тарафдори ҳисобланади.
2023 йил 7 октябрда бошланган Ғазодаги уруш оқибатида ҳозиргача 50 мингдан ортиқ фаластинлик ҳалок бўлди. Уруш ҲАМАС жанчиларининг Исроил жанубида 1 200 кишини ўлдириб, 250 кишини гаровга олгани ортидан бошланганди.
Индонезия ҳукумати можарони тинч йўл билан ҳал қилишда фаол иштирок этишни истамоқда. Прабово бу режалар осон эмаслигини тан олиб, Индонезия халқаро тинчликка ҳисса қўшишга тайёрлигини айтган.
Изоҳ (0)