Исроил ҳукумати Ғазо сектори аҳолисини “ихтиёрий равишда” кўчириш билан шуғулланадиган бошқарма тузди. Исроил бош вазири девони маслаҳатчиси Дмитрий Генделман маълумотни тасдиқлади. Бу ҳақда The Times of Israel хабар берди.
Ташаббусни Исроил ҳарбий-сиёсий кабинети 22 март куни бўлиб ўтган йиғилишда маъқуллаган. Янги бошқарма Мудофаа вазирлиги ҳузурида фаолият юритади. У фаластинликларнинг учинчи давлатларга чиқишини мувофиқлаштиради. Бошқарма қуйидагилар билан шуғулланади:
- Ғазо аҳолисининг хавфсиз ва назорат остида чиқиб кетишини ташкил этиш,
- ҳаракатланиш вақтида хавфсизликни таъминлаш,
- йўналишларни белгилаш,
- чегараларда текшириш,
- қуруқлик, денгиз ва ҳаво орқали ҳаракатланиш учун инфратузилмани яратиш.
Фаластинликларни ўз юртидан кўчириш таклифини илк бор АҚШ президенти Дональд Трамп илгари сурган эди. У Қўшма Штатлар Ғазо секторини “ўз назоратига олишини” айтиб, Миср, Иордания ва бошқа мамлакатларни кўпроқ фаластинлик қочқинларни қабул қилишга чақирган.
Кейинчалик Бирлашган Миллатлар Ташкилоти Трампнинг Ғазо секторида яшовчи фаластинликларни кўчириш режаси халқаро ҳуқуқни бузаётганини маълум қилган. Исроил эса АҚШ президентининг таклифини қўллаб-қувватлаган. Трамп Исроил ўз ҳудудини Ғарбий Соҳил ва Фаластин ҳисобига кенгайтиришига шама қилган. У Исроил минтақа давлатларига нисбатан гўёки жуда кичиклигини айтиб, “бу яхши эмаслигини” таъкидлаган.
Ғазони сотиб олиш ва унга эгалик қилишга қарор қилдим. Қайта тиклаш масаласига келсак, биз уни Яқин Шарқдаги бошқа давлатларга топширишимиз мумкин, улар алоҳида қисмларни қайта қуришлари учун ёки бошқалар бизнинг ҳомийлигимиз остида буни амалга ошириши мумкин, деганди АҚШ президенти.
У ҲАМАСнинг ҳудудга қайтишига йўл қўймаслик учун АҚШ Ғазо секторини ўз назоратида сақлаб туришга мажбурлигини таъкидлаган. Араб давлатлари эса Трампнинг режасини қоралаганди.
Изоҳ (0)