ҲАМАС матбуот котиби Ҳазем Қосим АҚШ президентининг Ғазо аҳолисини мажбуран кўчириш ҳақидаги режасидан воз кечганига ижобий муносабат билдирди.
Дональд Трампнинг мазкур баёноти 12 март куни Ирландия бош вазири Майкл Мартин билан Оқ уйдаги учрашув вақти янграган эди.
Агар бу сўзлар АҚШ президенти Ғазо аҳолисини кўчириш режасидан воз кечганини англаца, биз буни олқишлаймиз, деди ҲАМАС вакили.
Биз Оқ уйни мазкур позицияни мустаҳкамлаш ва сулҳ келишувининг барча шартларини бажариш учун босқинчи Исроилга босим ўтказишга чақирамиз, дея қўшимча қилди у.
Дональд Трампнинг Ғазо аҳолисини қўшни давлатларга кўчириб, анклавни АҚШ назоратига олиш ҳақидаги баёнотлари Яқин Шарқ, умуман олганда, бутун дунё бўйлаб резонанс келтириб чиқарган эди.
Урушни батамом тўхтатиш учун музокаралар
Исроил—ҲАМАС ўртасидаги сулҳ битимининг 42 кунлик дастлабки босқичи шу ой бошида якунланди. Бироқ томонлар кейинги босқич бўйича келишувга эришмади. Шундан сўнг Исроил анклавга тўлиқ блокада жорий қилди. Натижада 12 кундан буён секторга озиқ-овқат, ёқилғи ҳамда дори-дармон маҳсулотлари кирмаяпти. Мазкур ҳолат халқаро доираларда Фаластин халқига қарши “коллектив жазо” ва гуманитар ёрдамдан қурол сифатида фойдаланиш сифатида баҳоланмоқда.
Бироқ 6 март куни Қатарда урушни батамом тугатиш бўйича янги музокаралар бошланди. АҚШ бу учун ўзининг махсус вакили Адам Бойлерни Доҳага юборди. Маълум бўлишича, у ҲАМАС вакиллари билан бевосита музокара ўтказган. Унда АҚШ—Исроил фуқаролигига эга шахсни гаровдан озод қилиш ҳамда ўт очишни босқичма-босқич тўхтатиш режаси муҳокама қилинган.
Бироқ бу исроиллик сиёсатчилар, жумладан, бош вазир Нетаньяху ва молия вазири Бэтсасел Смотричнинг танқидларига сабаб бўлган. Адам Бойлернинг ўзи эса бунга муносабат билдириб, АҚШ Исроилнинг агенти эмаслигини таъкидлаб чиққан.
ҲАМАС делегацияси сўнгги икки кун ичида Миср воситачилари билан ҳам учрашиб, Исроил билан сулҳнинг кейинги босқичини муҳокама қилишга тайёрлигини билдирди. Тель Авив ҳам Доҳага ўз делегациясини юборди.
Ғазони тиклаш бўйича музокаралар
Араб давлатлари ташқи ишлар вазирлари 12 март куни Қатар пойтахтида Трампнинг Яқин Шарқ бўйича вакили Стив Виткофф билан учрашди. Улар Ғазони тиклаш масаласини муҳокама қилишган.
Учрашувда Қатар, Иордания, Миср, Саудия Арабистони, БАА ташқи ишлар вазирлари ҳамда Фаластин Озодлик Ташкилоти бош котиби иштирок этди. Ғазони қайта қуриш бўйича Араб Лигаси томонидан 4 март куни Қоҳирадаги саммитда тасдиқланган режа музокаралар марказида бўлди.
Изоҳ (0)