Ғазо секторида камида уч нафар бола совуқ қотишдан вафот этди. Бу ҳақда Фаластин соғлиқни сақлаш соҳасидаги манбаларга таяниб, WAFA ахборот агентлиги хабар берди.
Ҳозирда Ғазода совуқ қотиш оқибатида вафот этган болалар сони 10 нафарга етди. Ўт очишни тўхтатиш келишувига қарамай, Исроил ҳамон секторга гуманитар ёрдам киришини чеклаётгани айтилмоқда. Бу эса бошпана ва иссиқлик таъминоти билан боғлиқ муаммоларни келтириб чиқариб, Ғазо аҳолисининг аҳволини янада оғирлаштирмоқда.
Манбаларга кўра, кучли совуқ фонида Ғазо секторидаги кўплаб болалар “оғир аҳволда”. Исроил армиясининг Ғазо секторида 15 ойдан ортиқ давом этган ҳужумлари оқибатида 61 мингдан ортиқ фаластинлик ҳалок бўлди. Ғазода кўчирилганлар сони 2 миллион кишига етди.
ҲАМАС ва Исроил ўртасидаги ўт очишни тўхтатиш келишуви 600 мингдан ортиқ фаластинликларга ўзларининг шаҳар ва қишлоқларига қайтиш имконини берди. Улар қайтгач, яшаш учун яроқсиз ҳудудлардан бошқа ҳеч нарса топмади. Ғазодагилар ўт очишни тўхтатиш келишуви доирасида кўчма уйлар ва бошпаналарга муҳтож.
Бироқ Исроил ҳозиргача Ғазо секторига етарли миқдорда кўчма бошпана ва чодирлар киритилишига рухсат бермаган. Оилалар бир ярим йилдан кўпроқ вақт давомида қўлбола чодирлардан фойдаланиб келган ва энди очиқ жойларда яшамоқда.
Изоҳ (0)