“Барселона” футболчилари Педри ва Ламин Ямал бош мураббий Ҳанс-Дитер Фликка асосий таркиб борасида мурожаат қилишган. Бу ҳақда El Nacional нашрига таяниб Championat хабар бермоқда.
Манбага кўра, жамоанинг икки ёш юлдузи мураббийлар штабидан ҳужумчи Ферран Торресни асосий таркибга қайтаришни сўраган. Гарчи Торрес бу мавсумда кўп ҳолларда захирадан майдонга тушаётган бўлса-да, у “Барселона” учун ўйинни буриб юборадиган футболчи сифатида муҳим рол ўйнаб келмоқда.
Испаниялик ҳужумчи жорий мавсум 35 та ўйинда майдонга тушиб, ўз ҳисобига 16 та голни ёздириб қўйган. Шу сабабли улар Ферранни асосий таркиб учун мос футболчи деб ҳисобламоқда. Аммо каталонияликлар мураббийлар штаби Ямал ҳамда Педрининг илтимосига аниқ жавоб бермагани айтилмоқда.
Эслатиб ўтамиз, “Барселона” Ҳанс-Дитер Флик қўл остида 30 турдан сўнг 67 очко жамғарган ва Ла Лига турнир жадвалида биринчи ўринни эгаллаб турибди. Уларнинг асосий таъқибчиси “Реал” 63 очко билан 2-поғонадан жой олган.
Изоҳ (0)