“Barselona” futbolchilari Pedri va Lamin Yamal bosh murabbiy Hans-Diter Flikka asosiy tarkib borasida murojaat qilishgan. Bu haqda El Nacional nashriga tayanib Championat xabar bermoqda.
Manbaga ko‘ra, jamoaning ikki yosh yulduzi murabbiylar shtabidan hujumchi Ferran Torresni asosiy tarkibga qaytarishni so‘ragan. Garchi Torres bu mavsumda ko‘p hollarda zaxiradan maydonga tushayotgan bo‘lsa-da, u “Barselona” uchun o‘yinni burib yuboradigan futbolchi sifatida muhim rol o‘ynab kelmoqda.
Ispaniyalik hujumchi joriy mavsum 35 ta o‘yinda maydonga tushib, o‘z hisobiga 16 ta golni yozdirib qo‘ygan. Shu sababli ular Ferranni asosiy tarkib uchun mos futbolchi deb hisoblamoqda. Ammo kataloniyaliklar murabbiylar shtabi Yamal hamda Pedrining iltimosiga aniq javob bermagani aytilmoqda.
Eslatib o‘tamiz, “Barselona” Hans-Diter Flik qo‘l ostida 30 turdan so‘ng 67 ochko jamg‘argan va La Liga turnir jadvalida birinchi o‘rinni egallab turibdi. Ularning asosiy taʼqibchisi “Real” 63 ochko bilan 2-pog‘onadan joy olgan.
Izoh (0)