“Барселона” вингери Ламин Ямалнинг агенти Хорхе Мендеш футболчининг келажаги борасида фикр билдирди. Бу ҳақида журналист Виктор Наварронинг ижтимоий тармоқларидаги хабарига таяниб, Championat.com нашри маълум қилди.
Ямал “Барселона” билан шартномасини узайтиради. Ламин Каталонияда бахтли ва жамоа билан узоқ муддат қолишни истайди, — дея Мендешнинг сўзларини келтирди Championat.com нашри.
Ямал 17 ёшда экани сабабли “Барселона” билан узоқ муддатли шартнома имзолай олмайди. У шу йилнинг 13 июль куни 18 ёшга тўлади ва катта эҳтимол билан каталонияликлар билан 2030 йилга қадар амал қиладиган битим имзолайди. Унинг олдинги шартномасидаги товон пули 1 миллиард евро этиб кўрсатилган. Олдинроқ ОАВ орқали “ПСЖ” Ламин учун 250 миллион евро тўлашга тайёр эканлиги ҳақида миш-мишлар тарқалган эди. Бироқ испан клуби бу таклифга рад жавобини берган.
Жорий мавсумда 17 ёшли футболчи “Барселона” сафида барча турнирлар доирасидаги 35 та ўйинда майдонга тушиб, 11 гол ва 15 та голли узатмага муаллифлик қилди. Ямал “Барселона” клуби асосий таркибида 2023 йилдан бери ўйнамоқда. Унинг каталонияликлар билан амалдаги шартномаси 2026 йилнинг ёзига қадар мўлжалланган. Transfermarkt портали футболчининг нархини 180 миллион еврога баҳоламоқда.
Изоҳ (0)