УЕФА Чемпионлар Лигаси 2023/24 йилги мавсуми якунларига кўра, Мадриднинг “Реал” клуби энг катта миқдорда маблағ ишлаб топган жамоа бўлди. Турнирда ғолиблик, барча босқичлардаги иштирок ва телетрансляциялардан тушган даромадлар орқали “қаймоқранглилар” умумий ҳисобда 139 миллион еврога яқин фойда кўрган.
Шундан 125 миллион еврони барча босқичлардаги иштироки ҳамда мусобақа ғолиблиги ортидан қўлга киритган бўлса, 14 миллион евро телеҳуқуқлардан ишлаб топган.
Ушбу рейтингнинг иккинчи поғонасидан Парижнинг “ПСЖ” клуби жой олди – француз гранди ўтган мавсум ЕЧЛ ортидан 122,4 миллион евро қўлга киритган. Кучли учликни эса финалгача етиб борган Дортмунднинг “Боруссия” жамоаси якунлади – клуб 120 миллион евро фойда олган.
“Манчестер Сити” 110,5 миллион евро ишлаб топган бўлса, УЕФА Суперкубогида иштирок этгани учун яна 4,5 миллион евро мукофот олди. “Барселона” эса ЕЧЛдаги иштироки эвазига 98 миллион евро даромад олди.
Гуруҳ босқичидаёқ мусобақани тарк этган ва ўз гуруҳида охирги ўринни эгаллаган “Манчестер Юнайтед” ҳам тахминан 61 миллион евро ишлаб топишга муваффақ бўлди. Турнир иштирокчилари орасида энг кам маблағ ишлаб топган клуб — Бельгиянинг “Антверпен” жамоаси бўлди. Улар 22 миллион евродан камроқ маблағ олган.
Европа Лигаси бўйича эса энг кўп даромад олган клуб Леверкузеннинг “Байер” жамоаси бўлди – финалгача етиб бориб, “Аталанта”га ютқазган немис клуби 41,2 миллион евро даромад кўрди. Ғолиб чиққан “Аталанта” эса 34 миллион еврога яқин пул ишлаб топган.
Умуман олганда, 2023/24 йилги мавсумда УЕФА клублар ўртасидаги еврокубоклар учун умумий мукофот жамғармаси 2,2 миллиард евродан ошди. Янги мавсумда эса турнирлар форматининг ислоҳ қилиниши сабабли бюджет яна 25 фоизга оширилган.
Изоҳ (0)