УЕФА Миллатлар Лигаси чорак финал босқичининг жавоб ўйинида Испания терма жамоаси сафида ҳаракат қилган Ламин Ямал мусобақа тарихига кирди. 
Испаниялик футболчи учрашувда гол уриб, жамоасининг ғалабасига ҳисса қўшди ҳамда мусобақа тарихида янги рекорд ўрнатди.
17 ёш-у 258 кунлик бўлган Ямал турнир тарихида гол урган энг ёш футболчи сифатида қайд этилди. Бунгача мазкур рекорд унинг ҳамюрти ва “Барселона”даги жамоадоши Гавига тегишли эди. Гави 17 ёш-у 304 кунлигида Миллатлар Лигаси доирасидаги баҳсда ўз номига гол ёздириб қўйган эди.
Маълумот учун, Испания — Нидерландия баҳси 3:3 ҳисобида якунланди (биринчи учрашув — 2:2). Икки ўйин натижасига кўра, ғолиб номи пенальтилар сериясида аниқланди. Унда омад Испанияга кулиб боқди ҳамда “қизил фурия” ярим финал йўлланмасига эга чиқди.
Испания терма жамоаси Миллатлар Лигаси ярим финалида Францияга қарши 4 июнь куни ўйнайди.
“Қизил фурия” мусобақанинг амалдаги ғолиби ҳисобланади. Улар аввалги финалда Хорватияни (0:0, пенальтилар серияси — 5:4) мағлуб этиб, чемпионликни қўлга киритган эди.
Изоҳ (0)