31 март куни актёр Ким Су Хён кўплаб можаролар ва миш-мишларга сабаб бўлган айбловлардан сўнг, биринчи марта воқеаларга ўз муносабатини билдирди. У Ким Се Роннинг ўлимига оид илгари берилган маълумотларга раддия билдирди ҳамда судга мурожаат қилиш ниятида эканини айтди, деб хабар берди Korea JoongAng Daily нашрига таяниб “Правила жизни”.
-NFpCOltl.avif)
45 дақиқа давом этган матбуот анжуманида актёр ўз нутқини Ким Се Рон билан муносабатларини аввалига инкор қилгани учун узр сўраб бошлади:
“Мен бу ришталарнинг оқибатидан қўрқар эдим. Бир неча йил олдин у билан учрашганимни қандай тарзда тан олиш ҳақида кўп ўйладим ва доим босим остида бўлдим. Сўнг мени ёлғон маълумотларни тан олишга мажбур қилишди, аммо мен ҳақиқатга қарши чиқишга рози бўлмадим” деди Ким Су Хён.
Ким Се Рон билан муносабатларини тасвирлар экан, у бўлган вазиятни қуйидагича тушунтирди:
“Агар биз икковимиз ҳам актёрлар бўлмаганимизда эди, бизнинг жуфтлигимиз шунчаки одатий ҳолат сифатида қараларди. Аслида биз ҳақиқатда самимий бўлган туйғулар билан учрашдик ва барча муваффақиятсиз давом этган жуфтликлар каби ажрашдик. Сўнг бошқа алоқага чиқмадик”, дея сўзида давом этди актёр.
Шунингдек, Ким Су Хён вафот этган актрисанинг оила аъзолари ва Garosero Research Institute YouTube канали устидан даъво аризаси бериш ниятида эканлигини маълум қилди. У Ким Се Рон холасини судга бериши ҳамда компания иккисидан 12 миллиард вон (тахминан 8150 АҚШ доллари) миқдорда товон пули талаб қилишини айтди.
“Мен қарорларим учун ҳар қандай танқидни қабул қиламан, лекин бу ёлғон ҳақиқатга айланиши керак, дегани эмас. Агар менга нисбатан айбловлар ҳақиқат бўлса, марҳуманинг оиласи барча далил ва материалларни тергов органларига топширсин, мен тайёрман”, деди у.
Жанубий Корея оммавий ахборот воситалари таъкидлашича, матбуот анжумани давомида Ким Су Хён бирон марта актрисанинг исмини тилга олмаган, у фақат “марҳума” сўзидан фойдаланган.
Эслатиб ўтамиз, 16 февраль куни Ким Се Рон ўз квартирасида ўлик ҳолда топилган. Қизнинг оиласи “Hotel del Luna” драма сериалининг актёри Ким Су Хонни қизнинг ўлимида айблаган. Можаролар таъсирида Ким Су Хён бир нечта бренд билан тузилган шартномаларни йўқотган.
Изоҳ (0)