Корея Республикаси президенти маъмурияти терговчиларга ҳарбий ҳолат воқеалари билан боғлиқ қўзғолон иши бўйича президент биносида тинтув ўтказишга рухсат бермади. Бу ҳақда Юқори мансабдор шахсларга нисбатан коррупцияга қарши курашиш бошқармаси маълум қилди.
“Бошқарма жорий йилнинг 22 январь куни президент маъмурияти ва унинг қароргоҳида тинтув ўтказиш учун ордерни ижро этишга уриниб кўрди, бироқ президент маъмурияти соат 15:00 да тинтувга рухсат бермади. Махсус тергов қўмитасининг соат 16:50 даги эшитувларини ҳисобга олиб, ордер ижроси тўхтатилди”, дейилади бошқарма хабарида.
Жанубий Корея Жиноят кодексида таъкидланишича, давлат сири тўғрисидаги қонун билан қўриқланадиган ҳудудда тинтув ўтказиш учун тегишли органнинг розилиги зарур. Маъмурият бундай рухсатни бермади. Қароргоҳ билан ҳам худди шундай ҳолат юзага келди — президент қўриқлаш хизмати бошлиғи вазифасини бажарувчи шахс парламентда ҳарбий ҳолат воқеаларига бағишланган эшитувларда иштирок этаётган эди.
20 январь куни полиция президентнинг “махфий уйи”да тинтув ўтказишга муваффақиятсиз уриниб кўрди.
Yonhap нашрининг хабар қилишича, видеокузатув камераларидаги ёзувларни сақлаш учун серверлар Президент Хавфсизлик хизмати идорасида жойлашган. Бу серверлар тергов учун зарур, чунки Самчхондондаги уйда, тахминларга кўра, Юн Сок Ёл 3 декабрь куни ҳарбий ҳолат эълон қилинишидан уч соат олдин миллий ва пойтахт полицияси бошлиқлари билан учрашган. Полиция ўша куни президент ҳузурига яна кимлар кирганини аниқлаш ниятида.
Нашр маълумотларига кўра, Давлат хавфсизлик хизмати “ҳарбий сир ёки махфий ҳукумат маълумотлари сақланадиган жойларда тинтув ўтказиш учун ваколатли органларнинг розилиги талаб этилади” деган талабни рўкач қилиб, полициячиларга киришни рад этган. 11 декабрь куни полиция президент маъмуриятида тинтув ўтказишга уринган, аммо яна рад жавобини олган.
19 январь куни Сеулнинг Ғарбий округ суди импичмент натижасида лавозимидан четлатилган Юн Сок Ёлни қамоққа олиш тўғрисида қарор чиқарди. Унинг ўн минглаб тарафдорлари норозилик белгиси сифатида суд биносига бостириб киришди. Суднинг таъкидлашича, у қамоқхонадан ташқарида бўлса, исён ва ҳокимиятни суиистеъмол қилиш бўйича айбловлар билан боғлиқ далилларни йўқ қилиши мумкин. Шунга қарамай, Юн Сок Ёл ҳамон сўроққа келиш талабларини эътиборсиз қолдирмоқда.
Декабрь ойи бошида Жанубий Корея президенти мамлакатда ҳарбий ҳолат жорий этишга муваффақиятсиз уриниб кўрди, шундан сўнг парламент уни исён кўтаришга уринганликда айблаб, давлат раҳбарига импичмент эълон қилди.
Юн 14 декабрдан (парламент унинг импичменти учун овоз берганидан) президентлик лавозимидан четлаштирилган, аммо уни лавозимидан четлаштириш учун импичмент Конституциявий суд томонидан маъқулланган бўлиши керак. Суд қарор чиқармагунча, Юн Сок Ёл расман президент бўлиб қолади.
Юннинг ўзи декабрнинг биринчи ярмидаёқ қўзғолонга уриниш айбловларини рад этиб, ҳарбий ҳолат жорий этилиши “сиёсий жиҳатдан тасдиқланган қарор” эканини айтган. У давлатни фалаж қилган мухолифатдан ҳимоя қилиш учун шундай қарор қабул қилганди.
Изоҳ (0)