Жанубий Кореяда суд мамлакат президенти Юн Сок Ёлни ҳибсдан озод қилди, унга қарши ҳибсга олиш ордери эса бекор қилинди. Бу ҳақда Yonhap хабар берди.
Февраль ойида президент тарафдорлари Сеул марказий округ судига ариза билан мурожаат қилган, суд эса қамоққа олишни қонунга хилоф деб топган. Президентнинг адвокати Сок Дон Хённинг тушунтиришича, прокуратурада апелляция бериш имконияти мавжуд экан, президент озод қилинмайди.
Суднинг қамоқни бекор қилиш тўғрисидаги қарорига қарамай, озод қилиш дарҳол амалга ошмайди.
Марказий округ прокуратураси етти кун ичида апелляция бериши мумкин, агар улар апелляциядан воз кечса ёки белгиланган муддатда бу ҳуқуқдан фойдаланмаса, президент озод қилинади, деди адвокат.
Президент девони 7 март куни ҳибсдан озод қилиш тўғрисидаги суд қарорини олқишлади.
Юн Сок Ёлнинг ҳибсга олиниши
15 январь куни Жанубий Кореяда терговчилар иккинчи уринишда Юн Сок Ёлни ҳибсга олди. Ҳокимиятдан четлатилган президентни ҳибсга олишга биринчи уриниш 3 январь куни содир бўлганди. Бироқ ўшанда Юн Сок Ёлнинг қўриқчилари полиция ҳибсга олишига қаршилик қилган. Иккинчи уринишда эса узоқ давом этган қарама-қаршиликдан сўнг, терговчилар президентни Коррупция бўйича тергов бюросига олиб боришга муваффақ бўлди.
Юн Сок Ёл ушлангунга қадар видеомурожаат эълон қилиб, ҳибсга олишни “ноқонуний” деб билиши, аммо қон тўкилишининг олдини олиш учун терговчилар ва полицияга бўйсунишга қарор қилганини айтган.
Декабрь ойи бошида Жанубий Корея президенти мамлакатда ҳарбий ҳолат жорий этишга муваффақиятсиз уриниб кўрди, шундан сўнг парламент уни исён кўтаришга уринганликда айблаб, давлат раҳбарига импичмент эълон қилди.
Юн 14 декабрдан (парламент унинг импичменти учун овоз берганидан) президентлик лавозимидан четлаштирилган. Унинг ўзи декабрнинг биринчи ярмидаёқ қўзғолонга уриниш айбловларини рад этиб, ҳарбий ҳолат жорий этилиши “сиёсий жиҳатдан тасдиқланган қарор” эканини айтган. У давлатни фалаж қилган мухолифатдан ҳимоя қилиш учун шундай қарор қабул қилганди.
Президент адвокатларининг ҳибсга олишнинг қонунийлигига эътироз билдиришга уриниши туфайли унинг 48 соатлик қамоқ муддати тўхтатилганди. Кейинги ҳибсга олиш учун янги ордер чиқарилган.
Изоҳ (0)